Ուկրաինայի գլխավոր դատախազի առաջին տեղակալ Ռենատ Կուզմինը բաց նամակով դիմել է ԱՄՆ Կոնգրեսին, որտեղ բացատրել է Ուկրաինայի նախկին վարչապետ Յուլյա Տիմոշենկոյի շուրջ ստեղծված իրավիճակը:
Այս մասին ITAR-TASS-ին հայտնել է Ուկրաինայի գլխավոր դատախազության մամլո քարտուղար Մարգարիտա Վելկովան:
Նամակում Կուզմինը կոնգրեսմենների ուշադրությունն է հրավիրում այն փաստի վրա, որ Տիմոշենկոն կասկածվում է 4 մարդու սպանությանն առնչություն ունենալու մեջ, ու ինքը պատրաստ է ամերիկյան կողմին ծանոթացնել Տիմոշենկոյի մեղավորությունը հաստատող փաստաթղթերի հետ:
Ուկրաինայի գլխավոր դատախազի առաջին տեղակալի դիմումը ԱՄՆ Կոնգրեսին պայմանավորված էր նրանով, որ այս շաբաթ ԱՄՆ Կոնգրեսի սենատը Ուկրաինայի մասին բանաձև ընդունեց, որտեղ կոչ արեց Կիևի իշխանություններին ազատել Տիմոշենկոյին ու մյուս քաղբանտարկյալներին:
«Բանաձևի հիմքը կազմում է Տիմոշենկոյի հետ կապված իրավիճակը, որն ըստ իս՝ սխալ է ընկալվել որոշ ամերիկացի քաղաքական գործիչների կողմից: Մոլորության պատճառը անբավարար տեղեկացվածությունն ու միակողմանի գնահատականն է, որոնք ձևավորված են շահագրգիռ կողմի կողմից. Տիմոշենկոն մոլորության մեջ է գցել Սենատին՝ մատուցելով հատուկ ընտրված, միակողմանի տեղեկատվություն, որոնց հիմքում ընկած են միայն զգացմունքները, ոչ թե փաստերը»,- ասվում է նամակում:
Կուզմինը հիշեցրել է, որ «Տիմոշենկոյի գործում քննիչները հասել են ճշմարտությանը: Պահանջելով դադարեցնել ճշմարտության փնտրտուքները 4 մարդու սպանության հարցում՝ տարակուսանք է հարուցել մեր հասարակության մեջ: Միթե ամերիկյան իշխանությունը ցանկանում է ճշմարտության հաստատումը խոչընդոտել սպառնալիքներով՝ գործելով ուժի դիրքերից»:
Կուզմինը հայտնել է ԱՄՆ Կոնգրեսում ելույթ ունենալու պատրաստակամության մասին ու ներկայցնելու գոյություն ունեցող փաստաթղթերը, ինչպես նաև ամերիկյան ԶԼՄ-ներին պատմել գործի մասին:
«Ոչ մի կասկած չկա, որ 4 մարդու սպանության քրեական գործի դադարեցումը պահանջելը մեղք է Աստծո ու մարդկանց առաջ: Դրանով մենք այլ հանցագործություն կկատարենք՝ ցույց տալով նոր սերնդին, որ քաղաքական գործիչը, որը հասել է իշխանության, կարող է անպատիժ կատարել հանցագործություն, այդ թվում՝ սպանություն»,- ընդգծվում է նամակում:
Ուկրաինայի գլխավոր դատախազությունը կասկածում է Յուլյա Տիմոշենկոյին ու ԱՄՆ-ում պատիժ կրող նախկին վարչապետ Պավել Լազարենկոյին Դոնեցկի օդանավակայանում 1996թ. խորհրդարանի նախկին պատգամավոր Եվգենի Շչերբանին, նրա կնոջն ու ևս երկու մարդու սպանության մեջ:
