2011 թվականի համեմատ 2012-ին սննդային թունավորման դեպքերը նվազել են: «2012-ին գրանցվել է բոտուլիզմի 9 դեպք՝ 13 տուժածով, երկուսը՝ մահվան ելքով: 9 դեպքից 5-ը գրանցվել է մարզերում, իսկ 4-ը՝ Երևանում: Մահվան երկու դեպքը ևս գրանցվել է Երևանում՝ Արաբկիրում և Նոր Նորքում: 2011 թվականի նույն ժամանակահատվածի ընթացքում գրանցվել է 18 դեպք՝ 29 տուժածով, որոնցից երեքը մահվան ելքով՝ 14-ից ցածր տարիքի երեխաներ»,- «Առաջին լրատվական»-ի հետ զրույցում ասաց Առողջապահության նախարարության հիգիենիկ և հակահամաճարակային տեսչության սնուցման բաժնի գլխավոր մասնագետ Լիլիթ Հունանյանը: Նրա հավաստմամբ՝ մահվան երկու դեպքը տեղի է ունեցել բժշկի ուշ դիմելու պատճառով:
«Պահածոներից թունավորումները հիմնականում եղել են՝ վարունգի մարինադից, կարմիր և կանաչ պղպեղի պահածոյից, շուշանի թթվից, ծիծակի պահածոյից: Բայց առավել շատ հանդիպում են կարմիր պղպեղից թունավորումները»,- տեղեկացրեց մասնագետը: Նա նշեց նաև, որ թունավորումները գրանցվել են միայն տնային պայմաններում պատրաստված պահածոներից, գործարանային ոչ մի պահածոյից թունավորման դեպք չի գրանցվել:
Հունանյանի հաղորդմամբ՝ 2011 թվականի համեմատ սնկային թունավորման դեպքերը ևս նվազել են. «2011 թվականի այս նույն ժամանակահատվածի ընթացքում գրանցվել է սնկային թունավորման 18 դեպք՝ 40 տուժածով: Տուժածներից 3-ը եղել են 14-ից ցածր տարիքի երեխաներ: Այս տարի արձանագրվել է սնկային թունավորման 16 դեպք՝ 28 տուժածով, որոնցից 7-ը մինչև 14 տարեկան: Ո՛չ 2011-ին և ո՛չ էլ 2012-ին սնկային թունավորումից մահվան դեպք չի գրանցվել»:
«Գրանցվել է նաև խմբակային թունավորման մեկ դեպք՝ 11 տուժածով: Դեպքը տեղի է ունեցել հարսանիքի ժամանակ»,- հավելեց մասնագետը:
