Грузия Online-ի փոխանցմամբ՝ այսօր ընթացող Վրաստանի խորհրդարանական ընտրություններում, ժամը 12.00-ի դրությամբ, ընտրողների ակտիվությունը կազմել է 25.5 տոկոս: Այս մասին հատուկ ճեպազրույցի ժամանակ հայտարարել է Վրաստանի Կենտրոնական ընտրական հանձնաժողովի (ԿԸՀ) մամլո քարտուղար Էկա Ազարաշվիլին:
Վերջինիս խոսքերով՝ Վրաստանի շրջաններում քվեարկության ժամանակ գրանցվել են որոշակի միջադեպեր, սակայն դրանք չեն կրում լուրջ բնույթ: Ազարաշվիլին անդրադարձել է նաև բանտերում քվեարկության գործընթացին՝ ընդգծելով, որ այնտեղ ամեն ինչ հանդարտ է ընթանում:
Նշվում է, որ, ընդհանուր առմամբ, բանտերում բացվել է 12 ընտրատեղամաս, իսկ քվեարկելու իրավունք ունեցող բանտարկյալների թիվը 2852 է: Ընտրությունները խաղաղ են անցնում Գլդանի հայտնի թիվ 8 բանտում: Ներկայիս դրությամբ այնտեղ քվեարկությանը մասնակցել է մոտ 50 բանտարկյալ, մինչդեռ տվյալ բանտում ընտրելու իրավունք ունի մինչև 1000 դատապարտյալ: Այստեղ ընտրական գործընթացին հետևում են ընտրական հանձնաժողովի 11 անդամներ, ինչպես նաև հասարակակակն կազմակերպությունների 4 դիտորդներ:
