Չորեքշաբթի օրը Բրազիլիայում ձերբակալվել է Google ընկերության բրազիլական մասնաճյուղի ղեկավար Ֆաբիո Սիլվա Կոելյոն: Հայտնում են, որ ձերբակալությունը կապված է այն բանի հետ, որ Google-ը հրաժարվել է կատարել դատարանի վճիռը` YouTube-ից հեռացնել տեսանյութը, որում Կամպու-Գրանդի քաղաքի քաղաքապետի թեկնածուի հասցեին քննադատական գնահատական է հնչեցվում: Կոելյոյի ազատ արձակվելու պայմանն այն է, որ նա գրավոր խոստանա հետո կանգնել դատարանի առջև,- փոխանցում է «Ազատություն» ռադիոկայանի ռուսական ծառայությունը:
Նախորդ օրը Google-ը հայտարարել է դատարանի վճիռը բողոքարկելու մտադրության մասին, քանի որ, ընկերության ներկայացուցչի խոսքով, ինքը պատասխանատու չէ YouTube-ում հայտնվող տեսանյութերի բովանդակության համար:
Ինչպես հայտնում է BBC-ն` Բրազիլիայի ընտրությունների մասին օրենքը սահմանափակում է իշխանության մարմիններին քննադատելու ԶԼՄ-ների հնարավորությունը:
