ՆԱՏՕ-ն չի բացառում, որ Աֆղանստանից Ուլյանովսկի տարանցիկ կետով որոշ բեռների տեղափոխման համար կարող են օգտագործվել ռուսական ինքնաթիռներ: Այս մասին հաղորդում է RIA Novosti-ն՝ վկայակոչելով Դաշինքի տեղեկատվական բյուրոյի տնօրեն Ռոբերտ Պշելին:
«Ես կարծում եմ, որ մեծ հնարավորություններ կան, որպեսզի տեղափոխությունն իրականացվի ռուսական ինքնաթիռներով: Բայց այստեղ ամեն ինչ կախված է այն բանից, թե ինչպես կկազմվեն առևտրական պայմանագրերը: Սակայն շանսերը, կրկնում եմ, շատ են»,- ասել է նա:
Պշելը հիշեցրել է, որ Ռուսաստանի և ՆԱՏՕ-ի միջև մեկ պայմանագիր է կնքված եղել Ուլյանովսկի տարանցիկ կետի վերաբերյալ, որը սահմանում է երկրների փոխգործողությունների իրավական շրջանակը բեռների տեղափոխման ժամանակ:
«Այդ պայմանագրում գրանցված են տարբեր տեսակի պարտավորություններ՝ կապված այդ
թվում մաքսատան, ստուգման և այլնի հետ: Նախկինում կնքված պայմանագրերի փորձի վրա այժմ կոնկրետ երկիրը, գործնականում դա Պաշտպանության նախարարությունն է, պայմանագիր է կնքում Ռուսաստանում առևտրական ընկերության հետ»,- պարզաբանել է Պշելը:
Նա հիշեցրել է, որ ՆԱՏՕ-ն փորձ ունի նման պայմանագրեր իրականացնելու գործում, այդ թվում՝ Ռուսաստանի հետ: Ընդ որում՝ Պշելն ընդգծել է, որ ցանկացած կոնկրետ պայմանագիր կնքվում է ոչ թե հենց Դաշինքի, այլ ՆԱՏՕ-ի անդամ կոնկրետ երկրի հետ:
