Այսօր ԱԺ-ում ՀՀԿ պատգամավոր Վահրամ Բաղդասարյանը հայտարարեց, թե ՀՀ-ն մի ժամանակ թռչնամիս արտահանող երկիր էր, բայց վերջին տարիներին ներմուծում է: Նա գյուղնախարար Սերգո Կարապետյանից հետաքրքրվեց՝ թռչնաբուծության աճ ունեցե՞լ ենք, թե՞ ոչ: Նա հավելեց նաև, որ անցած տարի անասնաբուծության ոլորտում 0.1% աճը վերանայման կարիք ունի, քանի որ տեսանելի աչքով առկա է անկում:
Ս. Կարապետյանը հայտնեց, որ 2011-ին ձվի դեֆիցիտ էր, քանի որ թռչունների պատվաստումը պետական ծրագրից դուրս էր բերվել, ինչը հանգեցրեց գլխաքանակի անկման:
«Ընդհանրապես թռչնաբուծության զարգացման առումով լուրջ անելիքներ ունենք: Մեր արտադրության ծավալները մեզ չեն բավարարում. եթե ձվի արտադրությունը բավարարում է, ապա մսինը՝ ոչ»,- ասաց նախարարը՝ հավելելով, որ մշակվել է զարգացման ծրագիր, որը շուտով կներկայացվի կառավարությանը:
Ս. Կարապետյանը հավաստիացրեց, որ անասնագլխաքանակի աճ ունենք, ընդ որում, ըստ նրա` դա ԳՆ տվյալը չէ, այլ ԱՊՀ կառույցների ցուցանիշը: Նախարարը վստահեցրեց, թե ոլորտի աճի տեմպերը պահպանվում են, իրականացվեց Համայնքների զարգացման և մրցունակության ծրագիր, որը դեռ շարունակվում է ՀՀ 6 մարզերում, որտեղ անասնապահությունը ժողովրդի հիմնական զբաղմունքն է:
Ս. Կարապետյանը հայտնեց նաև, որ 36 հազար գյուղացիական տնտեսություններ արդեն օգտվել են գյուղվարկերից, և այժմ կրկին 7.5 մլրդ դամ վարկ է տրամադրվում: