Գերմանական Siemens ընկերությունը հերքում է Իրանին ականապատված սարքավորում մատակարարելու մասին տեղեկությունը: Այս մասին հաղորդում է BBC-ն:
Ավելի վաղ իրանական մեջլիսի` անվտանգության և օտարերկրյա կապերի կոմիտեի ղեկավար Ալաեդինա Բորուջերդին ընկերությանը մեղադրել էր Իրան մատակարարվող արտադրանքի ականապատման մեջ: Նրա խոսքով` իրանցի մասնագետներին հաջողվել էր Իրանի միջուկային ծրագրի համար նախատեսված սարքավորումներում հայտնաբերել մանրադիտակային չափերի պայթուցիկ սարքեր:
« Siemens –ը հերքում է բոլոր մեղադրանքները և նշում, որ ընկերությունը ոչ մի կապ չունի իրանական միջուկային ծրագրի հետ»,-հայտարարել է ընկերության մամլո-քարտուղար Ալեքսանդր Մակովեցը: Նա նաև նշել է, որ միջուկային էներգետիկայով զբաղվող ընկերության մասնաճյուղը Իրանի հետ չի համագործակցում 1979 թվականից:
BBC-ի փոխանցմամբ` 2010 թվականին իրանական միջուկային գործարանների համակարգչային ցանցը վարակած վիրուսը ևս Իրանի ղեկավարությունը կապել էր Siemens-ի մատակարարած սարքի հետ: Ընկերությունը հերքել էր բոլոր մեղադրանքները:
