Ֆրանսիայի նախագահ Ֆրանսուա Օլանդի ժողովրդականության վարկանիշը հասել է ռեկորդային ցածր ցուցանիշի: Այս մասին են վկայում սեպտեմբերի 13-20-ը Ifop-ի
(Հասարակական կարծիքի ֆրանսիական ինստիտուտ) անցկացրած սոցհարցումների արդյունքները:
Պետության ղեկավարի պաշտոնում Օլանդի գործունեությանը դրական գնահատական է տվել հարցվածների 43 տոկոսը` այն դեպքում, երբ օգոստոսին նրա գործունեությանը հավանություն է տվել հարցվածների 54 տոկոսը: Ֆրանսիայի վարչապետի ժողովրդականության վարկանիշը նույնպես իջել է` օգոստոսի 57 տոկոսանոց արդյունքից դառնալով 50: Այս մասին հաղորդում է Reuters գործակալությունը:
Մեկնաբանելով սոցհարցման արդյունքները` Օլանդը նշել է, որ իրեն երկար ժամանակ է անհրաժեշտ սոցիալիստների առաջարկությունները իրագործելու համար. «Ես կցանկանայի, որ ինձ դատեին իմ աշխատանքի արդյունքներով, իսկ դա ժամանակ է պահանջում»:
Նշենք, որ երդմնակալությունից հետո` այս տարվա մայիսին, Օլանդի վարկանիշը գերազանցել է 60 տոկոսը: Փորձագետները կարծում են, որ նրա ժողովրդականության նվազման հիմնական պատճառը երկրի տնտեսությունը վերակենդանացնելու և զանգվածային հեռացումները կանխելու նրա անկարողությունն է:
