Հնարավոր է՝ Քոչարյանը վերադառնա 2-3 տարի հետո՝ որպես վարչապետ: Այսօր լրագրողների հետ հանդիպման ժամանակ այս մասին ասաց ՀՀՇ վարչության անդամ Հովհաննես Իգիթյանը՝ անդրադառնալով ՀՀ երկրորդ նախագահ Ռոբերտ Քոչարյանի՝ քաղաքականություն վերադառնալու հավանականությանը:
Հարցին, թե Քոչարյանը կարո՞ղ է լինել ՀՀԿ թեկնածուն, նա պատասխանեց, թե Քոչարյանը նույնիսկ հնարավոր է՝ ԲՀԿ-ի թեկնածուն չլինի:
«Հաստատ Հանրապետականի թեկնածուն չի լինի, ԲՀԿ-ինն էլ, հնարավոր է, չլինի: Նա հնարավորություն չունի քաղաքականություն վերադառնալու, հետո հնարավոր է՝ ԲՀԿ-ն վերադարձնի երկու-երեք տարի հետո՝ որպես վարչապետ»,- մեկնաբանեց Հովհաննես Իգիթյանը:
Բանախոսը բացատրեց, թե ինչն է պատճառը, որ քաղաքականությունը պտտվում է երեք նախագահների շուրջը՝ ասելով, որ ստեղծված քաղաքական իրավիճակը հնարավորություն չի տալիս ծնվելու նոր քաղաքական գործիչների, ազատ բանավեճի բացակայությունը հնարավորություն չի տալիս նորերին դուրս գալու:
Համատեղ ասուլիսի ընթացքում ԱԺ ՀՀԿ-ական պատգամավոր Սուքիաս Ավետիսյանն էլ ասաց, թե լավ է, որ կան նախագահները, նոր անուններ ևս շոշափվում են:
Լուսանկարը՝ PanARMENIAN Photo-ի
