Գյումրիի նախկին քաղաքապետ Վարդան Ղուկասյանի դստեր նշանածի` Կարեն Եսայանի սպանության գործի նախաքննությունը շարունակվում է: Այս մասին «Հրապարակ»-ին հայտնեցին ոստիկանությունից:
Հիշեցնենք, որ սպանությունը տեղի էր ունեցել ապրիլի 12-ին, հրազենային վնասվածքներից տեղում մահացել էր Գյումրիի քաղաքապետի դստեր 27-ամյա փեսացու Կարեն Եսայանը: Դեռ փեսայի դին դիահերձարանում` Վարդան Ղուկասյանը լրատվամիջոցներին հայտարարեց, թե սպանությունը քաղաքական ենթատեքստ ունի ու իր քաղաքական հակառակորդների ձեռքի գործն է: Թվում էր, թե այդ հայտարարությունից հետո ճաղերի հետևում պետք է հայտնվեին Շիրակի մարզի ԲՀԿ-ական հայտնի դեմքերը, ովքեր թշնամական հարաբերությունների մեջ էին Վարդանիկ Ղուկասյանի հետ, սակայն դեպքից երեք օր անց` ապրիլի 15- ին, ձերբակալվեց, ապա կալանավորվեց Անիի նախկին ոստիկանապետի որդին` Հարություն Սարգսյանը: Սպանությունից մեկ օր անց` ապրիլի 13-ին, վրաերթի ենթարկվեց ու տեղում մահացավ սպանության գործը վարող ավագ քննիչ Վահրամ Բեյբությանը:
Հարություն Սարգսյանը շարունակում է կալանավորված մնալ: Մինչ օրս նա պնդում է, որ կապ չունի սպանության հետ: Նրան արգելել են տեսակցել ծնողների հետ: Հինգ ամսվա ընթացքում ոչ մի անգամ տեսակցություն չի թույլատրվել, ինչի կապակցությամբ Հարություն Սարգսյանի փաստաբան Լուսինե Սահակյանը թերթի հետ զրույցում ասաց, որ սա այս դեպքով անօրինականության շարունակությունն է. «Օրենքը նախատեսում է, որ համապատասխան հիմքերի առկայության դեպքում քննիչն իրավունք ունի նման սահմանափակման համար գրությամբ դիմել քրեակատարողական հիմնարկին, սակայն սա էդ դեպքը չէր, և քննիչն իրավունք չուներ նման սահմանափակում կատարել: Փաստորեն, կատարվել է ու շարունակությունն է անօրինականությունների, մասնավորապես Հարություն Սարգսյանն ի սկզբանե անօրինական է գտնվում անազատության մեջե: Իսկ թե ինչու է քննիչը սահմանափակել տեսակցությունը, եթե համապատասխան հիմքեր չկան, Լուսինե Սահակյանը խորհուրդ տվեց հարցնել հենց քննիչին: Թե նախաքննության ընթացքում ինչ է բացահայտվել, հայտնի չէ, սակայն լուրեր են շրջանառվում, որ այս գործը փակուղի է մտել, և դեռևս լուրջ ապացույցներ չեն հայտնաբերվել, որոնք կհաստատեն Հարություն Սարգսյանի մասնակցությունը այդ հանցագործությանը: Անգամ կանխատեսումներ կան, որ եթե նախաքննությունն այդ տեմպով շարունակվի, հնարավոր է նրան ազատ արձակեն:
