Սեպտեմբերի 15-ի առավոտյան մեկնարկել են ՀԱՊԿ «Փոխգործակցություն-2012» զորավարժությունները: Երեկ Ռուսաստանի հարավում նույնպես մեկնարկեցին «Կովկաս 2012» մասշտաբային զորավարժությունները:
«Կովկաս 2012»-ի նպատակն է ցույց տալ, որ ՌԴ-ն պատրաստ է կրկնել 2008-ը: Այս մասին «Առաջին լրատվական»-ի հետ զրույցում ասաց «Բազմազգ Վրաստան» ՀԿ ղեկավար Առնոլդ Ստեփանյանը՝ անդրադառնալով միաժամանակ Հայաստանում և Հյուսիսային Կովկասի Կուբան քաղաքում մեկնարկած`զորավարժություններին:
Վրացահայ հասարակական գործչի խոսքով՝ զորավարժությունները ազդում են հայ-վրացական հարաբերությունների վրա, և փոխվում է վրացի ժողովրդի վերաբերմունքը հայերի նկատմամբ` բացասական առումով: Բայց, ըստ Ա. Ստեփանյանի,պետության լիդերները հասկանում են, որ Հայաստանն այն վիճակում է, որ ՌԴ-ն ռազմավարական գործընկեր է, ուստի Հայաստանը չի կարող «ոչ» ասել Ռուսաստանին:
«Ուստի չեմ կարծում, որպետությունների միջև հարաբերությունները վատանան: Սա, ամենայն հավանականությամբ, ուժի ցուցադրություն է ՌԴ-ի կողմից: Սա նաև մեսիջ է այն իմաստով, որ իրենք պատրաստ են կրկնել 2008 թվականը»,- մեկնաբանեց Առնոլդ Ստեփանյանը:Վերջինիս խոսքով`այս մեսիջն անուղղակի կերպով հղվում է ոչ միայն Վրաստանին, այլև Վրաստանի գործընկեր պետություններին:
Զորավարժությունները տևելու են մինչև սեպտեմբերի 23-ը: Ընդհանուր առմամբ դրանց մասնակցելու են մոտ 8000 մարդ, ավելի քան 200 մարտական մեքենա, մոտ 100 հրանոթ, ինչպես նաև 10 ռազմանավ ու մոտորանավակ: Զորավարժությունները կանցկացվեն երկու փուլով՝ 4 հրաձգարաններում և Սև ու Կասպից ծովերի ջրատարածություններում:
Առաջին փուլն անցկացվելու է Կրասնոդարի երկրամասում գտնվող «Ռաևսկի» հրաձգարանում:
