«Հայաստանյան քրեակատարողական հիմնարկներում վիճակը մնում է ստաբիլ ծանր»,- հայտարարեց Հելսինկյան ասոցիացիայի փորձագետ Արսեն Բաբայանը:
Նա տեղակացրեց, որ ինչպես ողջ երկրում, այնպես էլ ՔԿՀ-ում գնաճ է տեղի ունեցել:
Բաբայանի խոսքերով, ՔԿՀ-ում շրջանառվող կաշառքների չափերը ևս աճել են: Ավելին` կալանավորից գումար են պահանջում անգամ հիվանդանոց պառկեցնելու համար. այդ գումարը սկսվում է 1000 դոլարից:
Կալանավորին զբոսանքի տանելու համար ևս գումար են պահանջում: Բաբայանի տեղեկություններով, Նուբարաշեն ՔԿՀ-ում շատ մարդիկ զբոսանքի չեն էլ գնում, քանի որ այդ ծառայությունը զբաղված է խուզարկություններ անելով:
Փորձագետի խոսքերով Քրեակատարողական վարչության նոր պետի` Հայկ Հարությունյանի նշանակումից հետո չափազանց վատացել է առողջական խնդիրներ ունեցող կալանավորների վիճակը: Բանն այն է, որ Հարությունյանի հրամանով ԱՆ դատապարտյալների հիվանդանոցից շատ հիվանդներ, դեռևս չբուժված, ուղարկվել են տարբեր ՔԿՀ-ներ:
Հելսինկյան ասոցիացիայի նախագահ Միքայել Դանիելյանն էլ նշեց, որ ՔԿՀ-ում կատարվողը իրենք որակում են որպես խոշտանգում: