Քադաֆիի կառավարության նախկին անդամ Մուստաֆա Աբդ Ալ-Ջալիլը, որը հրաժարական էր տվել` բողոքելով ժողովրդի դեմ կիրառված բռնություններից հետո, հայտարարել է, որ երկրում ստեղծվել է ժամանակավոր կառավարություն: Այդ կառավարությունը ղեկավարելու է ինքը` Ալ-Ջալիլը:
Նա ասել է, որ այս կառավարությունը նախապատրաստելու է երկիրն ընտրությունների, որոնք կայանալու են առաջիկա երեք ամիսների ընթացքում: Նա նաև ավելացրել է, որ այն, որ իր նստավայրն այս պահին երկրի արևելքում է, չի նշանակում, որ երկրի բաժանման մասին խոսք կարող է գնալ: Այս մասին հաղորդում է BBC-ն:
Մինչդեռ լրատվամիջոցները հայտնում են, որ ապստամբները մի քանի կողմից մոտենում են մայրաքաղաք Տրիպոլիին, որը Քադաֆիի վերջին հենակետն է: Երկրի հիմնական քաղաքներն արդեն ապստամբների վերահսկողության տակ են, ինչի մասին են վկայում միջազգային լրատվամիջոցները, որոնք արդեն կարող են հանգիստ լուսաբանել Լիբիայում տեղի ունեցող իրադարձությունները: Քադաֆիի ռեժիմն ընդհանրապես արգելել էր միջազգային լրատվամիջոցների աշխատանքն այս երկրում:
Այդուհանդերձ, Քադաֆին և նրա ընտանիքը փորձում են քարոզչական միջոցներով շտկել իրավիճակը: Քադաֆիի որդին` Սայֆ Ալ-Իսլամը հայտարարլ է, որ երկրի ¾-ն ապրում է հանգիստ կյանքով, սակայն չի հերքել, որ երկրում կարող է քաղաքացիական պատերազմ սկսվել:
ՄԱԿ-ի տյալներով, Լիբիայում սկսված ցույցերից հետո և Լիբիայի իշխանությունների բռնություններից փրկվելու համար Լիբիայի տարածքը լքել է մոտ 100 հազար մարդ: Փախստականների մեծ մասն օտարերկրյա աշխատուժն է, հիմնականում` Եգիպտոսի և Թունիսի քաղաքացիներ: ՄԱԿ-ի փախստականների հարցերով գործակալությունը հայտնում է, որ իրավիճակը գնալով բարդանում է, քանի որ ավելանում է փախստականների թվաքանակը:
