Հորդանանի թագավոր Աբդալլահ Երկրորդը Agence France-Presse-ին տված հարցազրույցում հայտարարել է, որ հարևան Իսրայելը բոլոր ուժերով խանգարում է իր թագավորության ատոմային ծրագրի զարգացմանը:
«Երբ մենք որոշեցինք սկսել աշխատանքները խաղաղ ատոմային էներգետիկայի ստեղծման շուրջ, համագործակցության համար դիմեցինք մի շարք պատասխանատու երկրների: Սակայն շուտով հասկացանք, որ Իսրայելը ճնշում է գործադրում մեր գործընկերների վրա՝ փորձելով դադարեցնել նրանց համագործակցությունը մեզ հետ»,- բացատրել է թագավորը:
Նրա խոսքերով՝ Հորդանանի պատվիրակությունը բանակցություններ է սկսում, իսկ մեկ շաբաթ անց «պոտենցիալ գործընկերների մոտ թռչում են իսրայելցիները՝ պահանջելով դադարեցնել աջակցությունը հորդանանյան միջուկային ծրագրին»:
Աբդալլահ 2-րդը պարզաբանել է, որ իր երկրին անհրաժեշտ է ատոմակայան՝ երկրի կարևորագույն խնդիրներից մեկը՝ ջրի պակասի հարցը լուծելու համար: Հորդանանի տարածքի 92 տոկոսը անապատ է, իսկ մյուս շրջաններում էլ անձրևներ հազվադեպ են լինում: Նման պայմաններում երկրի համար սուր անհրաժեշտություն է ունենալ ջրի աղազերծման տեխնիկա: Նման սարքերի համար էլեկտրաէներգիա մշակելու ամենահեշտ և էժան միջոցը ատոմակայաններն են:
Հորդանանի համար ատոմակայանի կարևորությունը նաև նրանով է պայմանավորված, որ այդ երկիրն չունի մեծ քանակությամբ հանածո ռեսուրսներ և ներմուծում է էներգառեսուրսների մոտ 95 տոկոսը: Դրա 80 տոկոսը բնական գազն է, որը ներմուծվում է Եգիպտոսից, և որը չափազանց անհուսալի աղբյուր է՝ հաշվի առնելով գազատար խողովակների պարբերաբար կրկնվող պայթյունները:
Թագավորի խոսքերով՝ միայն անցյալ տարի Իսրայելի միջամտության պատճառով իր երկիրը կորցրել է մեկ ատոմային ռեակտորին համարժեք գումար:
Աբդալլահ 2-րդը նաև հայտնել է, որ իրենք անգամ ԱԷԿ-ի կառուցման շուրջ բնապահպանների մտավախություններն են հաշվարկել, քանի որ պատրաստվում են կառուցել ամենաժամանակակից ատոմակայանը, որում հաշվի կառնվեն վթարների արդյունք հանդիսացող սխալները:
Հորդանանի կառավարությունը պատրաստվում է ատոմակայանի կառուցման մեջ ներդնել մոտ 5 մլրդ դոլար և հույս ունի, որ դա արդարացված ներդրում է: Ատոմակայանի շինարարության մեջ մասնակցությանը հավակնում են ֆրանսիական, ճապոնական և ռուսական ընկերությունները:
Իսրայելն ու Հորդանանը 1994 թվից խաղաղություն են պահպանում: Այնուամենայնիվ, Թել Ավիվը լիարժեքորեն չի վստահում իր սահմանակից այդ արաբական երկրին:
