Հոկտեմբերի 7-9-ը Էջմիածին քաղաքում կանցկացվի «Համաշխարհային ժառանգության քաղաքներ» կազմակերպության ընդհանուր ժողով և տնօրենների խորհրդի նիստը: Այս մասին այսօր ասուլիսի ժամանակ հայտնեց Էջմիածնի քաղաքապետ Կարեն Գրիգորյանը:
ՀՊԺՔԿ-ն միջազգային ոչ առևտրային կազմակերպություն է, որը ստեղծվել է 1993 թ. սեպտեմբերի 8-ին Մարոկոյի Ֆեզ քաղաքում: ՀՊԺՔԿ-ն ներառում է ՅՈՒՆԵՍԿՕ-ի համաշխարհային ժառանգության ցուցակում ընդգրկված 238 քաղաքներ: Կազմակերպության ընդհանուր ժողովը տեղի է ունենում 2 տարին մեկ անգամ:
Էջմիածինը կազմակերպությանն անդամակցել է 2007 թվից, իսկ 2008-ից լիիրավ անդամ է: ՀՊԺՔԿ-ի անդամներ են նաև Երևանը և Գորիսը:
Ինչպես տեղեկացրեց Կ. Գրիգորյանը, ՀՊԺՔԿ կողմից Էջմիածնին պատվոգիր հանձնելու դեմ փորձել են բողոքել թուրքերն ու ադրբեջանցիները. ՀՊԺՔԿ-ի անդամներ են Թուրքիայի մի քանի, իսկ Ադրբեջանի 1 քաղաք՝ Բաքուն: Այդ բողոքներին ի պատասխան՝ կազմակերպության ղեկավարը հայտարարել է, որ պատվոգիրն Էջմիածնին տրվում է արժանիքների համար:
Ինֆորմատիզացիայի միջազգային ակադեմիայի նախագահ Ազատ Վարդանյանը կարևորեց Հայաստանի մասնակցությունը միջազգային կազմակերպություններին, քանի որ դա է ամբիոնը՝ միջազգային հանրությանը ՀՀ ձայնը հասցնելու և թշնամական հայտարարություններին հակադարձելու: Ըստ նրա՝ այս ժողովը շատ լավ առիթ է համագործակցության կամուրջներ ստեղծելու համար:
Ա. Վարդանյանի խոսքով՝ ՅՈՒՆԵՍԿՕ-ի հուշարձանների պատմական ժառանգության ցանկում ընդգրկված են Էջմիածնի և Զվարթնոցի վանքերը, Գառնին, Գեղարդը և Սանահինի վանքերը, սակայն մեր երկրում կան բազմաթիվ այլ կառույցներ, որոնք պատմական նշանակություն ունեն:
«Քանի որ ինֆորմացիոն դաշտում մեծ պատերազմ է գնում, դրանք մեծ նշանակություն ունեն, և պետք է հասնենք նրան, որ դրանք ՅՈՒՆԵՍԿՕ-ի կողմից ճանաչում ստանան»,- ասաց Ա. Վարդանյանը:
Կ. Գրիգորյանը հավելեց, որ հոկտեմբերի 8-ին նշվում է Էջմիածին քաղաքի օրը: 2015 թ. Էջմիածինը կդառնա 2700 տարեկան: Ներկայում, մշակվել է զբոսաշրջային քարտեզ, որն առաջիկայում կներկայացվի հանրությանը:
