Հռոմի հանրահայտ Միլվիո կամրջից հանվել են «սիրո կողպեքները», որոնք հարսանիքի ժամանակ այնտեղ էին կախում նորապսակները: Կամուրջը սիրո խորհրդանիշներից մաքրելու համար աշխատակիցները կիրառել են հատուկ սեկատորներ: Ինչպես պարզվել է՝ կամրջից կախված կողպեքները կշռել են մի քանի տոննա:
Այժմ ռոմանտիկ նորապսակներին չի հաջողվի իրենց սերը հավերժացնել՝ կամրջի վրա կողպեք կախելով: XX թաղամասի (որտեղ գտնվում է կամուրջը) ղեկավար Ջանի Ջակոմինիի խոսքով՝ այդ նպատակով, հնարավոր է, կամրջի տակ հատուկ կոնստրուկցիա տեղակայվի:
Ինչ վերաբերում է կողպեքներին, ապա դրանք ներկայում գտնվում են քաղաքապետարանի պահեստում. դրանք այնտեղ կմնան այնքան ժամանակ, քանի դեռ իշխանությունները չեն որոշել դրանց տեղակայման վայրը: Euromag-ի փոխանցմամբ՝ կարծիք կա դրանք տեղափոխելու Մինչպատմական ժամանակների և Ազգագրության ազգային թանգարան: Ջակոմինին հավանություն չի տալիս այդ գաղափարին, քանի որ, նրա խոսքով՝ թանգարանը, որտեղ գտնվում է աշխարհի հնագիտական ժառանգության 90 տոկոսը, չի կարող դառնալ սիրահարների ռոմանտիկայի հանգրվանը:
Ավելի վաղ Հռոմի իշխանությունները կտրականապես դեմ էին կամրջի վրա կողպեքներ կախելու ավանդույթին: Կառույցն իրենից ներկայացնում է ճարտարապետության հուշարձան, իսկ կողպեքները փչացնում են կամրջի պատմական տեսքը և իրենց ծանրությամբ խարխլում են այն:
