«Նոր եթերաշրջանում խոստանում ենք հանդես գալ նոր կերպարներով. ինչը լավ էր, էլ ավելի կլավացնենք, և չզարմանաք` կարող ենք հայտնվել փողոցում՝ ձեր կողքին, ամեն պահի»,- այսօր լրագրողների հետ հանդիպմանը ասաց «Արմքոմեդի» երգիծական նախագծի հեղինակներից Նարեկ Մարգարյանը: Նա նշեց նաև, որ ստուդիական նկարահանումներից անցում կկատարեն դրսում նկարահանումներին, կունենան ուղիղ միացումներ, կապ Սփյուռքի հետ:
Մյուս հեղինակը` Սերգեյ Սարգսյանը, նշեց, որ այս տարի լարված քաղաքական տարի է լինելու, ինչը կօգնի իրենց նախագծին. «Մեր տեսադաշտից չեն վրիպում այն քաղաքական գործիչները, ովքեր իրենցից ինչ-որ հետաքրքրություն են ներկայացնում: Մեզ համար հատկապես օլիգարխների թեման է հետաքրքիր»:
Այն հարցին, թե ինչքանով է հեշտ նման կերպ ներկայացնել քաղաքական գործիչներին, բանախոսն ասաց. «Շատ հեշտ է քաղաքական երգիծանքը մի երկրում, որտեղ քաղաքականությունը մոտ է երգիծանքին: Սակայն նշեմ, որ քաղաքական գործիչներից ոչ ոք մեզանից դեռ չի նեղացել»:
