Իսրայելական Haaretz թերթի փոխանցմամբ՝ ԱՄՆ պետքարտուղար Հիլարի Քլինթոնն այսօր հայտաարել է, որ իր երկիրը որևէ վերջնագիր չի ներկայացնելու Իրանին: Քլինթոնը դրանով իսկ արձագանքել է Իսրայելի վարչապետ Բենիամին Նեթանյահուի այն հայտարարությանը, որում նա պահանջում է սահմանել «կարմիր գիծ», որը հատելը Թեհրանի համար կնշանակի պատերազմ:
Սակայն Քլինթոնն այս կապակցությամբ հայտարարել է. «Մենք որևէ ծայրահեղ գիծ կամ ժամկետ չենք սահմանել: Բանակցությունների շարունակումը շատ ավելի արդյունավետ մարտավարություն է: ԱՄՆ-ը մեծ ուշադրությամբ հետևում է Իրանի միջուկային ծրագրի զարգացմանը, սակայն, դրա հետ մեկտեղ, Թեհրանի հայտարարությունները տարանջատում է նրա իսկ գործողություններից: Դա հիրավի նույնը չէ:
Մենք հասկանում ենք Իսրայելի մտահոգությունը, որի դեմ է ուղղված իրանական հռետորիկան, սակայն ամեն դեպքում կարծում ենք, որ անհրաժեշտ է ժամանակ տրամադրել պատժամիջոցներին»: