Օգոստոսի 20-ից 31-ը Չինաստանում անցկացվեց աստղագետների գլխավոր համագումարը, որը տեղի է ունենում 3 տարին մեկ: Մեր երկիրը ներկայացրել էին երկու աստղագետներ՝ Բյուրականի աստղադիտարանից: Նրանցից մեկը՝ Բյուրականի աստղադիտարանի առաջատար գիտաշխատող Արեգ Միքայելյանն այսօր ասուլիսի ընթացքում ասաց, որ մենք ունենք լուրջ պոտենցիալ՝ դառնալու տարածաշրջանի աստղադիտական կենտրոնը:
Այս ոլորտում աշխարհը բաժանված է 8 տարածաշրջանների, Հայաստանը մտնում է Մերձավոր Արևելքի տարածաշրջանի մեջ. «Դեռևս համագումարից առաջ աստղադիտարանը հայտ էր ներկայացրել Միջազգային աստղագիտական միությանը, որպեսզի Հայաստանը դառնա մեր տարածաշրջանի կենտրոնը: Համագումարի ընթացքում տարածաշրջանի երկրներից միայն մեզ հրավիրեցին Հայաստանի և աստղադիտարանի մասին զեկուցում կարդալու համար»:
Բանախոսն ասաց, որ այդ ելույթից հետո պարզ դարձավ, որ Հայաստանը կդառնա տարածաշրջանի աստղադիտական կենտրոն, եթե լինի պետական աջակցություն. «Իրենք մեզ ասացին, որ միայն մի պայմանով մեզ կտան այդ ստատուսը, եթե լինի պետական ուղղորդված ծրագիր՝ այս ոլորտում: Մեր հպարտությունը մեր գիտությունը պետք է լինի, ցավոք սրտի, մեզ դրսում ավելի շատ են գնահատում»:
Սակայն նա հույս հայտնեց, որ պետական աջակցություն կստանան, քանի որ ոչ միայն Հայաստանում է՛լ ավելի է զարգանալու աստղագիտությունը, այլև մեր անունը հնչելու է միջազգային ասպարեզում:
