Իլյուզիոնիստ Դևիդ Կոպերֆիլդը գնել է վերջերս հայտնաբերված Մարտին Լյութեր Քինգի՝ 1960 թ. տված հարցազրույցի ձայնագրությունը: Ինչպես հաղորդում է Associated Press-ը, Կոպերֆիլդը պատրաստվում է այդ ձայնագրությունը հանձնել Մեմֆիսի քաղաքացիական իրավունքների ազգային թանգարանին:
Կոպերֆիլդի խոսքերով՝ Քինգը ոգեշնչում էր մարդկանց իրենց երազանքին հասնելու, իսկ իլյուզիոնիստի արվեստը տանում է դեպի այդ երազանքը, ուստի ինքը չէր ցանկանա, որպեսզի այդ հարցազրույցը կորչի: «Ես ցանկանում եմ, որպեսզի մարդիկ իմանան դրա մասին և շարունակեն տարածել Քինգի գաղափարները. չէ՞ որ ժամանակակից աշխարհում դրանք, ինչպես երբեք, կարևոր են»,- հայտարարել է իլյուզիոնիստը:
Քաղաքացիական իրավունքների ազգային թանգարանի նախագահ Բևերլի Ռոբինսոնը հայտարարել է, որ իր համար մեծ պատիվ է նման նվեր ստանալը: Նրա խոսքերով՝ աշխարհում շատ չեն այնպիսի թանգարանները, որոնք կկարողանային հպարտանալ Մարտին Լյութեր Քինգի ձայնագրությամբ:
Քինգի հարցազրույցի ձայնագրությունը պատահաբար հայտնաբերվել է Թեննեսի նահանգի բնակիչ Սթիվեն Թուլի կողմից: Վերջինիս խոսքերով՝ ինքը դա հայտնաբերել է ձեղնահարկում՝ հոր իրերը հավաքելիս: Թուլի խոսքերով՝ հայրը ցանկանում էր գիրք գրել Քինգի մասին:
Մարտին Լյութեր Քինգը համաշխարհային պատմության ամենահայտնի դեմքերից մեկն է, որը պայքարել է սևամորթների իրավունքների համար, ինչի համար արժանացել է Նոբելյան մրցանակի: 1968 թ. Քինգը սպանվել է Մեմֆիսում:
Քաղաքացիական իրավունքների ազգային թանգարանը գտնվում է Քինգի սպանության վայրի մոտակայքում:
