NullCrew ցանցահենների խումբը հարձակում է սկսել Կամբոջայի կայքերի վրա՝ ի պատասխան The Pirate Bay տորենտ պորտալի հիմնադիրներից մեկի՝ Գոթֆրիդ Սվարթհոլմի ձերբակալության: Այս մասին հաղորդում է The Wall Street Journal-ը:
«The Pirate Bay-ի հիմնադիրը ձերբակալվել է Կամբոջայում, այնպես որ, Կամբոջան թիրախ է դարձել»,- հայտարարել են NullCrew-ից՝ այդպիսով մեկնարկ տալով #OpTPB (“Operation The Pirate Bay”) անվանմամբ իրենց ցանցահենային հարձակմանը: Ցանցահենների թիրախ դարձած ռեսուրսների թվում են Կամբոջայի զինված ուժերի, հասարակական աշխատանքի նախարարության և Կամբոջայի ստանդարտների ինստիտուտի կայքերը:
Pastebin NullCrew ծառայությունում հրապարակվել են նշված կայքեր մատչում ունեցող օգտատերերի անվանումներն ու գաղտնաբառերը: Թե որքան լուրջ են հարձակման հետևանքները՝ հայտնի չէ:
Շվեդիայի նախաձեռնությամբ Սվարթհոլմի ձերբակալության մասին հայտնի է դարձել սեպտեմբերի սկզբին: Այդ ժամանակ հաղորդվում էր, որ Կամբոջայի և Շվեդիայի միջև արտահանձման մասին համաձայնագիր չկա: Սեպտեմբերի 4-ին Կամբոջայի իշխանությունները պատրաստակամություն հայտնեցին արտաքսել The Pirate Bay-ի հիմնադրին որևէ երկիր՝ համաձայն իմիգրացիայի մասին օրենքի:
2009 թ. Շվեդիայի դատարանը Սվարթհոլմին և The Pirate Bay-ի ևս 3 հիմնադիրների դատապարտել է մեկ տարվա ազատազրկման և խոշոր չափի տուգանքի՝ հեղինակային իրավունքների խախտման համար:
