Ռազմավարական և ազգային հետազոտությունների հայկական կենտրոնում (ՌԱՀՀԿ) այսօր տեղի է ունեցել «Փոփոխվող աշխարհ. Հայացք Երևանից» եռամսյա պարբերականի երկրորդ համարի շնորհանդեսը, որին ներկա էին փորձագետ-վերլուծաբաններ, լրագրողներ և հասարակայնության ներկայացուցիչներ:
Շնորհանդեսը բացել և ներկաներին ողջունել է ՌԱՀՀԿ գործադիր տնօրեն Կարապետ Կալենչյանը:
Իր խոսքում ՌԱՀՀԿ գիտական տնօրեն, «Փոփոխվող աշխարհ. Հայացք Երևանից» հանդեսի գլխավոր խմբագիր Մանվել Սարգսյանը նշել է, որ սույն թողարկումը գրեթե ամբողջությամբ նվիրված է ԱԺ 2012թ. մայիսի 6-ին տեղի ունեցած ընտրություններին առնչվող կարևորագույն հանգրվանների ու անցքերի վերլուծությանը, ինչպես նաև հետընտրական Հայաստանի ներքաղաքական զարգացումների լուսաբանմանը: «Ի՞նչ նշանակություն ունեն, ընդհանրապես, ընտրությունները Հայաստանում, արդյո՞ք նոր իրավիճակ է ստեղծվել վերջին խորհրդարանական ընտրությունների արդյունքում, ի հայտ եկա՞ն արդյոք պայքարի նոր, արդյունավետ ձևեր: Այս և նմանօրինակ շատ հարցերի պատասխաններ կարելի է գտնել մեր հանդեսի երկրորդ համարում»,- ասաց Սարգսյանը: Ըստ նրա, եթե երկրում չի գործում ազատ ընտրության մեխանիզմը, ապա կուսակցական գործունեությունը լիովին իմաստազրկվում է: Այս միտքն է նա զարգացրել համարում զետեղված իր հոդվածում:
Այնուհետև ելույթ են ունեցել պարբերականի 2-րդ համարի հոդվածագիրներից Արմինե Ղազարյանը, Զարուհի Հովհաննիսյանը և Լուսինե Պետրոսյանը` ներկայացնելով իրենց հետազոտությունների հանգուցային դրույթները: Որոշ հարցադրումներով հանդես եկան ու հավելյալ պարզաբանումներ ստացան Սահմանադրական դատարանի գլխավոր մասնագետ, իրավաբան Լիաննա Մկրտչյանը, «Հայաստանի Հանրապետություն» թերթի մեկնաբան Էմմա Բեգիջանյանը, «Աշխարհն առանց արգելքների» ՀԿ իրավաբան Աշոտ Սարգսյանը, ՀՀ-ում Արցախի ներկայացուցչության քաղաքական բաժնի վարիչ Աշոտ Մելյանը, «Թրանսփերենսի ինթերնեյշնլ» հակակոռուպցիոն կենտրոնի մասնագետ Վախթանգ Սիրադեղյանը և «Արմինֆո» լրատվական գործակալության լրագրող Նանա Մարտիրոսյանը:
«Փոփոխվող աշխարհ»-ի հերթական թողարկումը բացվում է ՀՀ Սահմանադրական դատարանի անդամ Վալերի Պողոսյանի հարցազրույցով, որտեղ, ի մասնավորի, դիտարկվում են արդյունավետ կերպով իշխանություն ձևավորելու կամ փոխելու` ՀՀ քաղաքացիների իրավունքի, մեզանում պատգամավորի ետկանչի մեխանիզմի, ինչպեսև հանրագրի (պետիցիայի) ինստիտուտի ներդրման և այլ հնարավորությունների հետ կապված հարցեր:
ԱԺ ընտրությունների հենքին լայնորեն արծարծվում են քաղաքական ուժերի ակնկալիքների, հետընտրական իրավիճակի մոդելավորման յուրահատկությունների ու ընտրությունների հոգեբանական նրբերանգների թեմաները: Կան կարևոր անդրադարձներ ՀՀ-ում քաղաքական պայքարի ձևերին և կուսակցական գործունեության տրամաբանությանը: Հատուկ բաժին է նվիրվում ԱԺ ընտրություններին աղերսվող փաստական նյութին` իրադարձությունների, տվյալների, դիտորդական արձագանքների և այլ գործընթացների ներկայացմանը:
Հիշեցնենք, որ ՌԱՀՀԿ-ի նոր հրատարակությունը նպատակ ունի տարածաշրջանային և համաշխարհային զարգացումների լույսով վերհանել այսօրվա ու վաղվա առանցքային խնդիրների, մարտահրավերների և հեռանկարների համայնապատկերը, առաջարկել թարմ գաղափարներ ու այլընտրանքային լուծումներ:
Ռազմավարական և ազգային հետազոտությունների հայկական կենտրոնը 1994թ. հիմնադրել է ՀՀ առաջին արտգործնախարար Րաֆֆի Կ. Հովհաննիսյանը՝ արժանանալով հայաստանյան և Սփյուռքի աջակիցների լայն շրջանակների զորակցությանը: Հետևելով համաշխարհային զարգացումներին, գիտելիքների հիմքեր խարսխելով, հանրության հետ երկխոսություն ծավալելով՝ Կենտրոնը հետխորհրդային տիրույթում հանդես է գալիս որպես երկրաքաղաքական ստեղծագործական մտածողություն ձևավորող և միջազգային միջավայրի համապարփակ ընկալմանը նպաստող ուժ: Վերջին շրջանում Կենտրոնն առաջնահերթ տեղ է հատկացնում տարածաշրջանային անվտանգության ու համագործակցության, քաղաքացիական կրթության, պետության և ազգի համար վճռորոշ՝ ներքին ու արտաքին քաղաքականությունների կիրառական հետազոտությանը:
