Արևմուտքը լայնամասշտաբ գաղտնի պատերազմ է սկսել Իրանի դեմ: Նման դիրքորոշմամբ է այսօր ելույթ ունեցել Իսլամական հանրապետության նախագահ Մահմուդ Ահմադինեժադը: Այս մասին հաղորդում է Associated Press-ը:
«Գաղտնի պատերազմ» ասելով` Իրանի նախագաը նկատի ունի պատժամիջոցներն ընդդեմ երկրի տնտեսության նավթային և ֆինանսական ոլորտների: «Լուրջ խոչընդոտներ կան դրամական փոխանցումների և նավթի արտահանման համար: Սակայն մենք կդիմակայենք և Աստծո օգնությամբ կհաղթահարենք բոլոր դժվարությունները»,-ասել է Ահմադինեժադը:
Նա նշել է, որ իր երկիրը հանդիսանում է ԱՄՆ-ի և մյուս երկրների ընկերը՝ բացի Իսրայելից: «Մենք ոչ մի խնդիր չունենք ամերիկացիների հետ: Մենք սիրում ենք նրանց, ինչպես մյուս ժողովուրդներին ու պետությունները»,- նշել է Ահմադինեժադը: Նրա խոսքով` ԱՄՆ-ի «իշխող շրջանակները» չեն ցանկանում հիմնվել իրանա-ամերիկյան կապերի վրա իսրայելական ազդեցության պատճառով:
Միջազգային Էներգետիկ գործակալության տվյալներով`իրանական նավթի հումքի արտահանումը 2012-ի մայիսից մինչև հուլիս կրճատվել է օրական 4 մլն բարելից 2,9 մլն բարելի:
Հիշեցնենք` ԵՄ-ն արգելել է իրանական նավթի ներկրումը հուլիսի 1-ից:
