«Հայկական ժամանակ»-ը գրում է, որ Հյուսիս-Հարավ մայրուղու շինարարության ժամանակ օգտագործվելու է հարյուր հազարավոր տոննաներով ցեմենտ, որի գերակշիռ մասը, հավանաբար, դրսից է ներկրվելու: Ինչպես հայտնի է, մայրուղու շինարարությունը գնահատվել է շուրջ մեկուկես միլիարդ դոլար և կառուցվելու է վարկային միջոցների հաշվին, որը խոստացել է տրամադրել Ասիական զարգացման բանկը: Այս ծրագրով նախատեսվում է Հայաստան-Իրան սահմանից մինչև Հայաստան-Վրաստան սահմանը կառուցել ժամանակակից արագընթաց ճանապարհ: Մայրուղու Երևան-Աշտարակ, Աշտարակ-Թալին և Երևան-Արարատ հատվածների շինարարության համար հայտարարված մրցույթում հաղթող է ճանաչվել իսպանական «Կորսան Կորվիամ Կոնստրուքսյոն Ս.Ա.» (Corsan Corviam Construction S.A.) ընկերությունը: Այս երեք հատվածների շինարարությունն իսպանական ընկերությունը խոստացել է իրականացնել 250 միլիոն դոլարով: Ծրագրի աոաջին հատվածը, որի շինարարությունը, պաշտոնական հայտարարությունների համաձայն, պետք է մեկնարկի այս ամսում, Երևան-Աշտարակ մայրուղին է լինելու:
«Հյուսիս-հարավ ճանապարհային միջանցքի ներդրումային ծրագրի իրականացման պետական ոչ առևտրային կազմակերպության» գործադիր տնօրեն Արա Հովսեփյանը «ՀԺ»-ի հետ զրույցում ասաց, որ Երևան-Աշտարակ մայրուղու շինարարության ընդհանուր արժեքը կազմում է շուրջ 24 միլիոն դոլար: Մայրուղու այս հատվածի շինարարության ընթացքում բետոնի մակերեսը կազմելու 1207 հազար քառակուսի մետր: Թերթի տեղեկություններով, Հյուսիս-հարավ մայրուղու շինարարության ընթացքում հիմնականում նախատեսվում է օգտագործել, այսպես կոչված, «500 մարկայի» ցեմենտ, որը Հայաստանի ցեմենտի երկու գործարաններից ոչ մեկն էլ չի արտադրում: Այս խնդրի հետ կապված մեր հարցին ի պատասխան` Արա Հովսեփյանն ասաց, որ ճանապարհաշինության հաստատված չափանիշներով` շինարարական կազմակերպությունը պետք է ապահովի «B30» դասի բետոն, որը ստանալու համար օգտագործվում Է«Շ500» մարկայի բետոն:
«Մենք պատվիրատուն ենք և ասում ենք, որ ճանապարհը կառուցեն այսինչ չափանիշներին համապատասխան: Տվյալ դեպքում ճանապարհի բետոնը պետք է լինի այնպիսին, որ բավարարի մեր նախանշած չափանիշներին: Կոնկրետ այդ ցեմենտն իրենք կգնեն այստեղից կամ ուրիշ տեղից` մենք չենք նշել մրցութային փաստաթղթերում, և իմաստ էլ չուներ նշել, որովհետև մեզ` որպես պատվիրատու որակն է հետաքրքրում, որպեսզի մեր պահանջած ճանապարհը կառուցվի»,- ասաց Հյուսիս-հարավ ԾԻԳ-ի ղեկավարը: Վերջինս, չհերքելով այն լուրերը, որ Հյուսիս-հարավ մայրուղու շինարարության համար ցեմենտը դրսից է ներկրվելու, միաժամանակ խուսափեց խնդրի վերաբերյալ որոշակի պատասխան տալ:
«Հիմա թե շինարարը ոնց կորոշի բետոնի խնդիրը լուծել, ես չեմ կարող ասել: Ես իրենց ոչ կարող եմ ասել, որ անպայման ցեմենտը պետք է գնեն Հայաստանից և ոչ էլ կարող եմ ասել` պետք է դրսից ներմուծեն»,- ասաց Հովսեփյանը: Ավելին, ըստ նրա, եթե իրենց ԾԻԳ-ը որևէ կերպ միջամտի և շինանյութի ընտրության հարցում փորձի ուղղորդել իսպանական ընկերությանը, ապա դա կարող է միջազգային աղմուկի առիթ դառնալ: «Փաստաթղթերում ոչ մի տեղ ամրագրված չի, որ ցեմենտն իրենք այսինչ երկրից պետք է ձեռք բերեն: Մեր կողմից ցանկացած քայլ շինարարի հանդեպ` կդիտվի միջազգային նորմերի խախտում»,- ասաց Արա Հովսեփյանը:
Ըստ «ՀԺ»-ի` չնայած ձևական տեսանկյունից իսպանական ընկերությունն է որոշելու` ցեմենտը որտեղից գնի, բայց գործնականում այդ որոշումը կայացվել է ՀՀ կառավարության անուղղակի ուղղորդմամբ: Չմոռանանք, որ ՀՀ կառավարությունն է հայտարարել, որ ցանկանում է Հայաստանում միջազգային չափանիշներին համապատասխան ճանապարհ կառուցվի և պատրաստ է վարկ վերցնել ու վճարել դրա դիմաց: Իհարկե, բացառված չէ, որ ի վերջո իսպանական ընկերության կառուցած ճանապարհը լինի հայկական չափանիշներով ու հայկական հումքով և մատուցվի իբրև միջազգային չափանիշներին համապատասխան ճանապարհ, բայց դրա մասին մինչև իմանանք` ահագին ժամանակ կանցնի:
