Գոյություն ունեցող տեսանյութերի կայքերի առաջատար YouTube-ը, բացի սիրողական տեսանյութերն ամբողջ աշխարհին ցույց տալուց, դրանով լավ փող վաստակելու հնարավորություն է տալիս: Կայքի նախաձեռնող այցելուներն արդեն վաղուց հոբբին վերածել են աշխատանքի:
«Հազարավոր մարդիկ կան, ովքեր մեզ մոտ վեցանիշ թվով գումարներ են վաստակում: Այդ գումարներով նրանք արդեն կարող են բիզնես ունենալ»,- պատմել է YouTube-ի գործընկեր ծրագրի ղեկավար Բինգ Չենը:
Նրա խոսքով` ընդամենը մեկ տարի առաջ նման «վիդեոգործարարների» թիվը չէր գերազանցում մի քանի հարյուրը: Բայց գնալով ավելի շատ մարդ է ներգրավվում այդ բիզնեսում, և նրանց շահույթներն արագորեն աճում են: Նրանց շահույթը վերջին 4 տարիների ընթացքում տարեկան 2 անգամ ավելացել է:
Ամենից հաճախ հաջողության են հասնում նրանք, ովքեր ինչ-որ բանի մասին տեսադասեր են տեղադրում:
Հաջողություն են գրանցում նաև նրանք, ովքեր մարդկանց ծիծաղեցնելու տաղանդ ունեն:
