Նոր տեղեկությունների համաձայն՝ իրականում Լոռու մարզի Ախթալա քաղաքի գործող քաղաքապետ, քաղաքապետի թեկնածու Հայկազ Խաչիկյանի տան ու մեքենայի ուղղությամբ կրակոցներ չեն հնչել, սակայն հարձակում, այնուամենայնիվ, եղել է:
Մի քանի անձինք, ներխուժելով քաղաքապետ Հայկազ Խաչիկյանի հայրական տուն, ավերել են տան գույքը, կոտրել ապակիները, այնուհետ նաև՝ քաղաքապետի անձնական օգտագործման Մերսեդես մակնիշի ավտոմեքենայի դիմապակին:
Ըստ Ախթալայում շրջանառվող լուրերի՝ այս ամենի հետևում կանգնած ու հարձակման անմիջական մասնակիցն է Ախթալայի լեռնահարստացման կոմբինատի Անվտանգության ծառայության պետ Արսեն Չիթչյանը՝ առավել հայտնի Բոդոլ մականունով: Ավազակային հարձակման արդյունքում ոչ ոք չի տուժել:
Ըստ շրջանառվող խոսակցությունների, հնարավոր է նաև, որ հարձակումն ուղղված է եղել ոչ թե անձամբ Հայկազ Խաչիկյանի, այլ եղբոր՝ Սոցիալական ապահովության ծառայության նախկին պետ Վազգեն Խաչիկյանի դեմ:
Այս պահին, ըստ տեղեկությունների, ոստիկանության Թումանյանի բաժնում են դեպքի հետ առնչվող մի քանի անձինք՝ Ախթալայի բնակիչներ, այդ թվում նաև Հայկազ Խաչիկյանը:
Նշենք, որ հսկողության տակ են վերցված Լոռու և Տավուշի մարզի ճանապարհները, Բագրատաշենի անցակետը՝ ավազակային հարձակում կատարող անձանց գտնելու համար, առավելապես հսկվում է Վանաձոր-Ալավերդի ավտոճանապարհը:
