Երեկ Կասկադում, «Գաֆէսճեան» արվեստի կենտրոնի նախաձեռնությամբ, «Գաֆէսճեան» քանդակների պարտեզում տեղադրվեց կոլումբիացի քանդակագործ և նկարիչ Ֆերնանդո Բոտերոյի «Ծխող կինը» քանդակը: Այս մասին «Առաջին լրատվական»-ի հետ զրույցում հայտնեց «Գաֆէսճեան» արվեստի կենտրոնի հանրային կապերի և մարկետինգի պատասխանատու Լիլիթ Սոխակյանը:
«Այս մոնումենտալ աշխատանքը համալրեց Բոտերոյի` «Գաֆէսճեան» քանդակների պարտեզում տեղադրված երկու արձանների շարքը` «Կատուն» ու «Հռոմեացի զինվորը»,- ասաց Լ. Սոխակյանը:
Մեզ հետ զրույցում նա ուրախությամբ տեղեկացրեց, որ կան մի շարք քանդակներ, որոնք հերթով կտեղադրվեն «Գաֆէսճեան» պարտեզում, «Գաֆէսճեան» արվեստի կենտրոնում ու Հիսունամյակի հուշարձանի հարևանությամբ:
1932 թ. ծնված Ֆերնանդո Բոտերոն, որն աշխատում է ֆիգուրատիվիզմի տեխնիկայով, մեծ ճանաչում է ձեռք բերել 1959 թ. կոլումբիացի նկարիչների ցուցահանդեսում առաջին մրցանակի արժանանալուց հետո: Քանդակագործն իրեն անվանում է «բոլոր կոլումբիաներից ամենակոլումբիացին»:
Բոտերոյի «Պարողները» քանդակը 2007 թ. աճուրդում վաճառվել էր ռեկորդային` 1.7 մլն դոլարով:
