ԱՄՆ-ի քաղաքացու փորձը` ստիպել հայրենակիցներին հավատալ ձնեմարդու գոյությանը, դժբախտ ավարտ է ունեցել: Ինչպես գրում է NEWSru.com-ը` տղամարդը մահացել է բրդոտ կամուֆլյաժային հանդերձանքով (ըստ նրա` պետք է որ հենց այդ տեսքն ունենար ձնեմարդը) այն բանից հետո, երբ նրան երկու մեքենա է հարվածել մայրուղու վրա:
Դեպքը տեղի է ունեցել Մոնտանա նահանգի Կալիսպել քաղաքում:
Ոստիկան Ջիմ Շնայդերն ասել է, որ տղամարդը գնացել է աջակողմյան երթևեկության հատվածով: Նա ասել է, որ տղամարդուն հարվածած առաջին մեքենայի ղեկին մի 15 տարեկան սոմերսցի աղջիկ է եղել: Մյուս հարվածողը եղել է նույն քաղաքի 17-ամյա մի բնակչուհի:
Մահացածը Կալիսպել քաղաքի 44-ամյա բնակիչ Ռենդի Լի Թենլին է եղել: Տարօրինակ արարքի պատճառը ոստիկանները համարել են տղամարդու շատ հարբած լինելը:
