Արարատի և Վայոց ձորի մարզերի ընդհանուր իրավասության դատարանը օգոստոսի 30-ին կշարունակի ամուսնու և սկեսրոջ կողմից բռնության ենթարկված Մարիամ Գևորգյանի հայցի քննությունն ընդդեմ սկեսրոջ` Հայկանուշ Միքայելյանի: Մարիամ Գևորգյանի փաստաբան Նոնա Գալստյանը «Առաջին լրատվական»-ի հետ զրույցում նշեց, որ այս գործով վերջին 2 նիստերը հետաձգվել են մեղադրող դատախազի բացակայության պատճառով: Դատարանը, փաստաբանի փոխանցմամբ, անցել է ապացույցների հետազոտման փուլին, սակայն թե ինչ դիրքորոշում է ցուցաբերում գործի նկատմամբ` հայցվոր կողմն առայժմ չի շտապում եզրակացություններ անել:
«Դատարանում հիմա կատարվում են միայն օրենքով նախատեսված գործողություններ, մնացածն արդեն մեզ համար պարզ կդառնա վճռի հրապարակումից հետո»,- «Առաջին լրատվական»-ի հետ զրույցում նշեց խոշտանգված հարսի փաստաբան Նոնա Գալստյանը:
Ինչ վերաբերում է դատական նիստերը դռնփակ անցկացնելու որոշման բողոքարկմանը, փաստաբանը հայտնեց, որ հայաստանյան երկու դատական բարձր ատյանները միանգամայն տարբեր պատճառներով են մերժել իրենց հայցը: Նշենք, որ հայցվոր կողմը վերաքննիչ դատարան էր դիմել դատական նիստերը դռնբաց անցկացնելու պահանջով, սակայն Վերաքննիչը չէր ընդունել այն` պատճառաբանելով, թե նման որոշումները չեն բողոքարկվում: Սակայն ինչպես «Առաջին լրատվական»-ին փոխանցեց խոշտանգված հարսի փաստաբանը, վճռաբեկ ատյանը նույն բողոքը չի ընդունել ոչ թե այն պատճառով, որ նման որոշումները չեն բողոքարկվում, այլ որովհետև դատարանը գտել էր, թե բողոքը հիմնավորված չէ:
Հիշեցնենք, որ դատարանին նիստերը դռնփակ անցկացնելու միջնորդությունը ներկայացրել էին Մարիամ Գևորգյանի ամուսնու առաջին կինը` Մելինե Բայաթյանը, և սկեսուրը՝ Հայկանուշ Միքայելյանը: Իսկ տուժած հարսը վստահ է, որ դռնփակ դատավարության պայմաններում արդար դատաքննություն չի իրականացվի, և մեղավորները կկարողանան խուսափել պատժից:
Ինչպես ինքը՝ տուժած հարսն է պատմել, սկեսուրը՝ Հայկանուշ Միքայելյանը, իրեն խոշտանգումների է ենթարկել որդու` Դավիթ Զիրոյանի հետ: Գևորգյանը Զիրոյանի հետ ամուսնացել է 2009 թվականի նոյեմբերին, նույն տարվա դեկտեմբերին տեղափոխվել է Սանկտ Պետերբուրգ, որտեղ իրեն 10 ամսվա ընթացքում պարբերաբար ծեծի և կտտանքների են ենթարկել: Երևան վերադառնալուց հետո Գևորգյանը դիմել է ոստիկանություն: Ամուսնուն մեղադրանք է առաջադրվել «Դիտավորությամբ ուրիշի առողջությանը միջին ծանրության վնաս պատճառելու» և «Ծեծ» հոդվածներով, որի համաձայն՝ նրան կարող էին դատապարտել մինչև 3 տարվա ազատազրկման: Դատարանի որոշմամբ` Զիրոյանն ազատ է արձակվել Հայաստանի Հանրապետության 20-ամյակի կապակցությամբ ՀՀ նախագահի կողմից հայտարարված համաներմամբ: Հայկանուշ Միքայելյանի դեմ առաջադրվել է մեղադրանք Քրեական օրենսգրքի 113 (միջին ծանրության վնասվածքներ հասցնել) և 119 (խոշտանգում) հոդվածներով:
