Սյունիքի մարզպետարանի դահլիճում մարզի համայնքի ղեկավարների ու մարզային փրկարարական ծառայության աշխատակիցների հետ հանդիպման ժամանակ ՀՀ արտակարգ իրավիճակների նախարար Արմեն Երիցյանը հայտարարեց, որ պետք է ստեղծել «հայ փրկարարի կերպար»:
«Արտակարգ իրավիճակների նախարարությունը պետք է դարձնենք այնպիսի կառույց, որ յուրաքանչյուր քաղաքացի վստահի փրկարար ծառայությանը: Այդ գործում կարևոր են նաև բնակչության ու տեղական իշխանությունների հետ հանդիպումները, և առկա խնդիրների համատեղ քննարկումները»,-ասաց նախարարը:
Վերջինս խոսեց նաև անցած տարվա աշխատանքների ու այս տարվա անելիքների մասին:
Նախարարը կարևորեց հանրապետությունում ճգնաժամային կառավարման կենտրոնի, «911» ծառայության, աղետների ռիսկերի նվազեցման պլատֆորմի ստեղծումը:
«Պետք է պատրաստ լինենք դիմակայելու ցանկացած աղետի, առավել ևս, որ Հայաստանի տարածքին, բացի ցունամիից, բնորոշ են բոլոր աղետները: Ճիշտ պաշտպանության նպատակով պետք է իրազեկված լինի բնակչությունը: Դրա համար պետք է միավորենք բոլոր ուժերը», – ասաց նախարարը:
2010թ. արդյունքներով քաղաքացիական պաշտպանության և արտակարգ իրավիճակների հետևանքների վերացման բնագավառներում ունեցած ակնառու հաջողությունների համար ՀՀ ԱԻ նախարարի պատվոգրերով ու շնորհակալագրերով պարգևատրվեցին մարզպետարանի քաղաքաշինության վարչության աշխատակիցներ, մարզի համայնքների ղեկավարներ, ԱԻ մարզային վարչության աշխատակիցներ:
