Երկուշաբթի Սյունիքի մարզպետ, ՀՀԿ մարզային կազմակերպության նախագահ Սուրիկ Խաչատրյանը մարզպետարանում Կապանի տարածաշրջանի 51 պատանիների եւ աղջիկների հանձնեց ՀՀԿ անդամատոմսեր:
Երիտասարդ հանրապետականների խոսքով, իրենք ընտրել են իշխանական այս կուսակցությունը, որովհետև ընդունում են կուսակցության վարած արտաքին եւ ներքին քաղաքականությունը, վստահում են հանրապետության նախագահին, մարզպետին, կուսակցության տարածքային կազմակերպությանը եւ ուզում են իրենց լուման ներդնել պետության կայացման գործում:
Ըստ նրանց` այս պարտավորվածությունը սրբորեն պետք է կատարեն:
ՀՀԿ Կապանի շրջանային խորհրդի նախագահ, փոխմարզպետ Վաչե Գրիգորյանի խոսքով, «երիտասարդների նման քայլը ամենեւին էլ հետագայում կարիերայի ստեղծման նպատակ չունի»:
Նորաթուխ հանրապետական երիտասարդներից շատերը արդեն աշխատում են, մի մասն էլ սովորում է:
Սյունիքի մարզպետ Սուրիկ Խաչատրյանի խոսքով էլ, «ցեղակրոնությունը սյունեցու մեջ է»:
«Շատ կուսակցություններ կան, բայց դրանք պատմություն չունեն, ներդրում չունեն, ու բազմիցս ապացուցվել է, որ Հանրապետականն է կանգնել ժողովրդի կողքին»,-ասաց մարզպետը:
Ի դեպ, 25 երիտասարդ էլ առաջիկա օրերին կդառնա հանրապետական: Կուսակցության տարածքային խորհրդում նրանց դիմումները դեռ քննարկվում են:
