Գերմանիայի առաջնության 23-րդ տուրից հետո մրցաշարային աղյուսակում ընդամենը մեկ փոփոխություն գրանցվեց` 8-րդ և 9-րդ հորիզոնականներում գտնվող «Հոֆենհայմ»-ն ու «Նյուրնբերգ»-ը փոխվեցին տեղերով:
Կանխատեսելի հաղթանակներ տարան Դորտմունդի «Բորուսիա»-ն, «Բավարիա»-ն, «Բայեր»-ը, «Հանովեր»-ը, «Նյուրնբերգ»-ը, «Ֆրայբուրգ»-ը և «Համբուրգ»-ը: Ամբողջ տուրում ընդամենը մեկ անսպասելի արդյունք գրանցվեց. Վերջին հորիզոնականում գտնվող «Բորուսիա Մյունխենգլադբախ»-ը 2:1 հաշվով պարտության մատնեց այս մրցաշրջանի ամենաանկանխատեսելի թիմին` «Շալկե»-ին: Հանդիպման երկրորդ րոպեին Կլյուգեի խփած գոլին տանտերերից պատասխանեցին Ռեուսն (12 ր.) ու Իդրիսսուն (23 ր.): Ավելորդ չէ նշել, որ մինչ այս հանդիմը «Բորուսիա Մ.»-ն այս մրցաշրջանում սեփական հարկի տակ ոչ մի հաղթանակ չէր տոնել:
Տուրի կենտրոնական խաղում «Բավարիա»-ն հյուրընկալվելիս պարտության մատնեց «Մայնց»-ին: Ի դեպ, մյունխենցիներն այս մրցաշրջանում սեփական հարկի տակ միակ պարտոըթյունը կրել էին հենց «Մայնց»-ից, բայց այն ժամանակ ոչ միայն «Մայնց»-ն էր բոլորին հաղթելով առաջ ընթանում, այլև «Բավարիա»-ի հիմնական կազմի ֆուտբոլիստներից շատերը վնասվածքներ ունեին ու չէին մասնակցում այդ հանդիպմանը: Այժմ պատկերը բոլորովին այլ է. Տուհելի սաներն էլ առաջվանը չեն և գնալով նահանջում են մրցաշարային աղյուսակում, իսկ Վան գալի թիմը վերջին խաղերում միավոր չի կորցնում: Բացի դրանից շարք վերադարձած Ռոբենով ու Ռիբերիով «Բավարիա»-ից միավոր կորզելը հաստատ բարդ կլինի անգամ եվրոպական գերակումբների համար:
Սպասվածի համաձայն` «Բավարիա»-ն ամբողջ խաղի ընթացքում տիրեց տարածքային և խաղային նախաձեռնությանը: 9-րդ րոպեին վերոհիշյալ Ռիբերին ու Ռոբենը հարվածային դիրք դուրս բերեցին Շվայնշտայգերին, ով դիպուկ հարվածով բացեց հանդիպման հաշիվը: 50-րդ րոպեին նույն Ռոբենի փոխանցումից հետո աչքի ընկավ Մյուլլերը: 77-րդ րոպեին իր հերթապահ գոլը խփեց նաև ընթացիկ առաջնության ռմբարկուների ցուցակը գլխավորող Մարիո Գոմեսը: «Մայնց»-ի ֆուտբոլիստներին հաջողվեց ընդամենը մեկ գոլ խփել: 83-րդ րոպեին աչքի ընկավ Ալլագուին: «Մայնց»-«Բավարիա»` 1:3:
Միանձնյա առաջատար Դորտմունդի «Բորուսիա»-ն երկու ոչ-ոքիներից հետո 2:0 հաշվով հեշտ հաղթանակ տարավ «Ստ. Պաուլի»-ի նկատմամբ և շարունակում է պահպանել 10 միավորի առավելությունը երկրորդ տեղում ընթացող «Բայեր»-ից: Վերջինն իր հերթին 4:2 հաշվով պարտության մատնեց «Շտուտգարտ»-ին և 3 միավորով գերազանցում է «Բավարիա»-ին:
Մյուս հանդիպումներում գրանցվեցին հետևյալ արդյունքները` «Նյուրնբերգ»-«Այնտրախտ»` 3:0, «Ֆրայբուրգ»-«Վոլֆսբուրգ»` 2:1, «Համբուրգ»-«Վերդեր»` 4:0, «Հանովեր»-«Կայզերսլաուտերն»` 3:0, «Հոֆենհայմ»-«Քյոլն»` 1:1:
