«ՀԱԿ-ի այսօրվա հանրահավաքը հերթական չէ, այսօր լինելու է բացառիկ հանրահավաք, և կոչ եմ անում բոլորին միանալ մեզ»,- լրագրողների հետ հանդիպման ժամանակ ասաց ՍԴՀԿ ատենապետ Լյուդմիլա Սարգսյանը:
Սարգսյանի գնահատմամբ, երկրում ստեղծվել է ծայրահեղ իրավիճակ` հասարակությունը չի ցանկանում այլևս այսպես ապրել, իսկ իշխանություններն ի վիճակի չեն այլ կերպ կառավարելու:
ՍԴՀԿ ատենապետը նշեց, որ այս հանրահավաքն ուղղված է լինելու մեր հասարակության ամենաաղքատ հատվածի խնդիրների արծարծմանը, ինչպես նաև հաշվի է առնվելու հավաքվածների ցանկությունը, քանզի, ինչպես նշեց ՍԴՀԿ ատենապետը, ժողովրդի ցանկությունն ՀԱԿ-ի համար օրենք է:
Հայաստանում եգիպտական մոդելի կրկնության հավանականությանն անդրադառնալով՝ Սարգսյանը ասաց, թե ոչ մի բան բացառել պետք չէ, բայց մերի նման երկրի պարագայում, երբ կան փակ սահմաններ, թշնամական տրամադրություններով հարևաններ, պետք է ավելի ողջախոհ լինել. «Եթե կարող ենք ժողովրդավարական ճանապարհով իրականացնել իշխանափոխություն, ապա արյունահեղությունից պետք է խուսափել»:
Անդրադառնալով ԺԿ առաջնորդ Տիգրան Կարապետյանի սկսած շարժմանը և այն հանգամանքին, թե կարո՞ղ է Կարապետյանը միանալ ՀԱԿ-ին՝ Լյուդմիլա Սարգսյանն ասաց, որ եթե Տիգրան Կարապետյանն իրական ընդդիմություն է ու հետապնդում է նույն նպատակները, ինչ ՀԱԿ-ը, ապա միավորման հարցում խնդիր չի լինի:
«Իսկ եթե սա մի երրորդ ուժ է, որը ստեղծվել է ժողովրդին ապակողմնորոշելու համար, ապա դա մոտ ապագայում ակնհայտ կդառնա»,- եզրափակեց Սարգսյանը: