ИТАР-ТАСС-ին տված հարցազրույցի ժամանակ Ռուսաստանի փոխարտգործնախարար Գրիգորի Կարասինը հայտարարել է, որ Ռուսաստանը չի բացառում, որ Վրաստանի ղեկավարությունը կարող է սադրանքի գնալ Աբխազիայի ու Հարավային Օսիայի նկատմամբ.
«Նախևառաջ ցանկանում եմ մեկ սկզբունքային հստակություն մտցնել, որ այլևս գոյություն չունի վրաց-հարավօսական (ինչպես նաև վրաց-աբխազական) կոնֆլիկտ: Այդ հակամարտություննրի մասին ճիշտ էր մինչև 2008 թվականի օգոստոսը խոսելը:
Դժբախտաբար, դրանց խաղաղ կարգավորման փորձերին, որոնք տարիների ընթացքում ձեռնարկել են Ռուսաստանն ու միջազգային հանրությունը, վերջ տրվեց 2008 թվականի օգոստոսին, երբ վրացական կողմը, կոպիտ կերպով ոտնահարելով միջազգային պայմանավորվածությունները, լայնամասշտաբ զինված հարձակում ձեռնարկեց Հարավային Օսիայի խաղաղ բնակիչների ու ռուս խաղաղապահների դեմ:
Դրա հետևանքով կործանվեց հակամարտության խաղաղ, քաղաքական կարգավորման գործընթացը, իսկ Վրաստանի հակամարտությունները ստացան իրենց վերջնական կարգավորումը՝ ի դեմ միջազգային իրավունքի երկու նոր անկախ սուբյեկտների՝ Աբխազիայի Հանրապետության ու Հարավային Օսիայի Հանրապետության առաջացման: Այժմ այդ հանրապետությունների ներկայացուցիչները մասնակցում են Անդրկովկասի անվտանգության խնդիրների վերաբերյալ Ժնևյան քննարկումներին:
Պաշտոնական Թբիլիսին նախկինի նման հրաժարվում է Սուխումի ու Ցխինվալի հետ ստորագրել ուժի չկիրառման մասին իրավաբանորեն պարտադրող համաձայնագիր: Ուշադրություն դարձնելով ռազմական արկածախնդրություններին հակված վրացական ներկայիս ղեկավարի անկանխատեսելիության վրա՝ ոչինչ չի կարելի բացառել:
Ներկայիս իրավիճակում, երբ Վրաստանում սկսվում է խորհրդարանական ընտրությունների կամպանիան, մեծ կլինի գայթակղությունը ներքաղաքական նպատակներով տարածաշրջանում նոր սադրանքներ կազմակերպելը»:
