Իսրայելը թույլ չի տվել «Չմիավորման շարժման» չորս երկրների ներկայացուցիչներին մոտենալ Հորդանան գետի արևմտյան ափին, որտեղ նախատեսված էր Շարժման կոնֆերանսը` պաղեստինյան հռչակագրի մշակման նպատակով: Մերժվել էին Մալազիայի, Ինդոնեզիայի, Կուբայի և Բանգլադեշի ներկայացուցիչները: Քննարկվող փաստաթղթում նախատեսվում էր աջակցել 1967 թ. Իսրայելին անցած Հորդանան գետի արևմտյան ափին և Գազայի հատվածում պաղեստինցիների կողմից պետություն ստեղծելու պահանջները:
Որպես համերաշխության նշան` կոնֆերանսից հրաժարվեցին նաև «Չմիավորման շարժման» մյուս երկրների ներկայացուցիչները:
«Մենք մուտքի իրավունք ենք տվել այն երկրների ներկայացուցիչներին, որոնց հետ ունենք դիվանագիտական հարաբերություններ, և մերժել ենք նրանց, որոնց հետ այդ հարաբերությունները բացակայում են: Մեղմ ասած, անցյալում «Չմիավորման շարժումը» ոչ մի կոնստրուկտիվ հաջողության չի հասել: Առաջիկայում նրանք պատրաստվում են հանդիպել Իրանում` այդ երկրի ներկայացուցչի նախագահության ներքո»,- հայտարարել է Իսրայելի կառավարության ներկայացուցիչ Իգալ Պալմորը:
Պաղեստինյան իշխանությունները քննադատել են Թել Ավիվի գործողությունները: «Իսրայելը օգտագործում է զավթիչի իր դիրքը, որպեսզի Պաղեստինին թույլ չտա նորմալ հարաբերություններ ունենալ այլ երկրների հետ, և մեկուսացնում է Պաղեստինի ժողովրդին»,- ասել է Պաղեստինի Ազատագրման կազմակերպության ներկայացուցիչը:
«Չմիավորման շարժումը» ստեղծվել է 1961 թ.` ռազմական գործողություններին չմասնակցելու սկզբունքով. այս պահին նրա անդամ է 120 պետություն:
