Մոլդովայի իշխանությունները հերքել են տեղեկատվությունն այն մասին, թե պետությունը պատրաստվում է հարկեր սահմանել տնական գինի արտադրողների վրա: РБК-ի հաղորդմամբ` Մոլդովայի գյուղատնտեսության և սննդի արդյունաբերության նախարարությունը նշել է, որ օգոստոսի 3-ին գյուղնախարարության աշխատակցի հայտարարությունը` տնական գինի արտադրողներից հարկեր գանձելու մասին` գինու արտադրության անհրաժեշտ սահմանը գերազանցելու դեպքում, աշխատակցի անձնական կարծիքն է` հիմնված եվրոպական երկրների փորձի վրա:
Գյուղատնտեսության և սննդի արդյունաբերության նախարարությունը նույնիսկ հայտարարել է, որ չի նախատեսում մշակել օրինագիծ, որով հարկեր կամ տուրքեր կսահմանի մանր գինեգործությամբ զբաղվողների վրա: Դեռ ավելին` նա նշել է, որ դա նույնիսկ իր իրավասությունների մեջ չէ:
Մոլդովայի գյուղնախարարությունը մշակել է օրենքի նախագիծ, համաձայն որի` իրենց երկրում գինին համարվում է ոչ ալկոհոլային խմիչք: Այս օրինագիծն արդեն հաստատել է կառավարությունը, և այն գտնվում է խորհրդարանում: Կառավարության նախաձեռնության շնորհիվ գինին չի ակցիզավորվում:
