Վերլուծելով 2009-2010թթ. ՀՀ-ում խղճի ազատության վերաբերյալ օրենսդրական իարվիճակը` Համագործակցություն հանուն ժողովրդավարության կենտրոն ՀԿ նախագահ Ս. Դանիելյանը փաստում է, որ երկու տարիների ընթացքում խղճի ազատությունը բազմիցս ոտնարարվել է պետական բարձր պաշտոնյանների կողմից: Արմեն Աշոտյանը, օրինակ, այս տարի հայտարարել է, որ «ուսանողները պիտի վերադառնան եկեղեցի»:
«Աշոտյանը կարող է նման կարծիք ունենալ, սակայն որպես կրթության և գիտության նախարար` նա իրավունք չունի նման արտահայտություն անել»,- ասում է Դանիելյանը:
Մարդու խղճի ու դավանանքի ազատությանը հակասող հայտարարություն է արել նաև ոստիկանապետ Ալիկ Սարգսյանը: Ոստիկանապետը մասնավորապես ասել է, որ «ակտիվ պայքար է տանելու էմոների և աղանդավորների դեմ»:
Անհանդուրժողական ենթատեքստով հրապարակումներ են լույս տեսնում նաև հայկական մամուլում: Դանիելյանը օրինակ է բերում «Իրավունք» թերթում լույս տեսած մի հոդվածից մեջբերում: Անցյալ տարի անցկացված կրոնի ազատության թեմայով միջազգային քննարկումը լուսաբանելով` «Իրավունքի» թղթակիցը գրել է. «Երբեք չէի տեսել այսքան շատ աղանդավորներ մի տեղ, միայն մի շիշ բենզինն էր պակասում»:
Նույնիսկ հաշվի առնելով խղճի ազատության ոտնահարման նշված և բազում այլ օրինակները` Դանիելյանը հարկ է համարում նշել, որ իրավիճակը շատ ավելի անմխիթար է հարևան Ադրբեջանում և Իրանում, ինչը պայմանավորված է մահմեդական դավանանքով: Խղճի ազատությունը չի պահպանվում նաև Վրաստանում:
