Թուրքական Ihlas լրատվական գործակալության փոխանցմամբ՝ ադրբեջանական մեծաթիվ բնակչություն ունեցող Իգդիրում գործող այսպես կոչված «Հայկական անհիմն պնդումների դեմ պայքարի միությունը» (ASİM-DER) ստորագրահավաք է կազմակերպել՝ պահանջելով վերանայել ադրբեջանցի լեյտենանտ Ռամիլ Սաֆարովի դատավճիռը:
2004 թվականի փետրվարի 19-ին Սաֆարովը Բուդապեշտում քնած վիճակում կացնի հարվածով նենգաբար սպանել էր հայ սպա Գուրգեն Մարգարյանին, ով նույնպես մասնակցում էր ՆԱՏՕ-ի «Գործողություն հանուն խաղաղության» ծրագրին: 2006 թվականին հունգարական դատարանը Սաֆարովին դատապարտեց ցմահ ազատազրկման՝ առանց առաջին 30 տարում համաներման իրավունքի, քանի որ սպանությունը կրել է միտումնավոր բնույթ և առանձնացել է հատուկ դաժանությամբ, ինչպես նաև նրա համար, որ դատական գործընթացի ժամանակ Սաֆարովը զղջման նշաններ ցույց չէր տվել:
ASİM-DER-ի նախագահ Գյոքսել Գյուլբեյը հայտարարել է, որ իրենք հավաքել են 2500 ստորագրություն և էլեկտրոնային փոստի միջոցով դրանք ուղարկել են Անկարայում Հունգարիայի դեսպանատուն: Գյուլբեյը Սաֆարովի կողմից Մարգարյանին սպանելը համեմատել է 1921 թվականի մարտի 15-ին Սողոմոն Թեհլերյանի կողմից Բեռլինում Թալեաթ փաշային սպանելու հետ.
«Այն ժամանակ գերմանական դատարանը 1.5 օրվա դատավարության ժամանակ արդարացրեց Թեհլերյանին՝ դա պատճառաբանելով նրանով, որ 1915 թվականի այսպես կոչված հայկական կոտորածները զգալի ազդեցություն են ունեցել նրա հոգեվիճակի վրա: Սաֆարովը նույնպես գտնվել է նմանատիպ հոգեվիճակում: Նրա դատավճիռը պետք է վերանայվի»:
