Երեկ առավոտյան ինքնասպանություն է տեղի ունեցել Լոռու մարզի Լորուտ գյուղում: Սեփական տան պատշգամբում կախվելու միջոցով ինքնասպան է եղել 72-ամյա Հ. Ստեփանյանը:
Ըստ գյուղացիների շրջանում շրջանառվող լուրերի՝ ծեր կինը եղել է հիվանդ՝ տարիներ առաջ կաթված էր ստացել, իսկ դրանից հետո կնոջ մոտ հայտնաբերվել է ուռուցք, ինչի հետևանքով մշտապես հարսի ու որդու խնամքի ներքո էր: Եվ հենց նրանց այլևս հոգս չպատճառելու համար էլ նա դիմել է ինքնասպանության:
Լորուտ գյուղի գյուղապետ Հրաչյա Սահակյանը «Առաջին լրատվական»-ի հետ զրույցում պատմեց, որ Հ. Ստեփանյանի ընտանիքը բաղկացած էր 6 անձից. նա ապրում էր որդու, հարսի ու նրանց երեք զավակների հետ:
Ընտանիքը զբաղվում էր անասնապահությամբ. դեպքի օրը տանը կինը մենակ է եղել: «Հարսն ու որդին էդ ժամանակ սարում են եղել՝ անասունների հետ: Գյուղացիները պատշգամբում էդ կնոջը կախված տեսնելով՝ տեղյակ են պահել որդուն. դրանից հետո են տան անդամներն իմացել»,-ասաց Հրաչյա Սահակյանը:
Նրա բնութագրմամբ՝ Ստեփանյանների ընտանիքը աշխատող է, գյուղում ոչ մի վատ բանով աչքի չի ընկնում, ու, ըստ գյուղապետի, ընտանիքը ոչ մի կերպ չի ազդել կնոջ որոշման վրա, ու բոլորի համար կնոջ այդ քայլն անակնկալ է եղել:
Շուշաննա Գրիգորյան՝ Լոռու մարզային թղթակից
