Դեռևս 3 տարի առաջ ՀՀ վարչապետ Տիգրան Սարգսյանի հանձնարարականով հանրապետության տասը մարզերում կազմվեցին ու մշակվեցին մարզային զարգացման քառամյա ծրագրեր:
Համաձայն այդ ծրագրերիʽ մարզերը առաջնորդվելու և զարգանալու էին 2010-2013 թվականներին: 270 միլիարդ դրամ գումար: Այսքան էր պահանջվում,որ Շիրակի մարզում առկա սոցիալ- տնտեսական, բիզնես, մշակութային ու առողջապահական ծրագրերը կյանքի կոչվեին: Իսկ մինչ իշխանության ներկայացուցիչները շարունակում են բարձրաձայնել այն մասին, որ Շիրակի մարզը, ի թիվս մյուս մարզերի, շարունակում է զարգանալ համաձայն մարզային քառամյա զարգացման ծրագրի, հրապարակված պաշտոնական տվյալները փաստում են բոլորովին հակառակը: Ամենաաղքատ մարզ:
Ազգային վիճակագրական ծառայության հրապարակած տվյալների համաձայնʽ Շիրակի մարզը գլխավորում է հանրապետության ամենաաղքատ մարզերի աղյուսակը: Մեր մարզում աղքատությունը կազմում է 47 տոկոս այն դեպքում, երբ Հայաստանում աղքատության միջին ցուցանիշը 34 տոկոս է : Մինչդեռ Հայաստանի իշխանությունները մեկ անգամ չէ, որ հրապարակավ կարևորել են տարածքների համաչափ զարգացման ռազմավարությունը: Այդ խոստումը 2008 թվականին տվել էր նաև նախագահի թեկնածու Սերժ Սարգսյանը: Շիրակի մարզը գործազրկության մակարդակով ևս շարունակում է մնալ առաջին տեղում: Իսկ մարզային զարգացման քառամյա ծրագրով նախատեսված էր աշխուժացնել ոչ միայն մարզային բնակավայրերը, այլև նպաստել աշխատատեղերի ստեղծմանը, խթանել փոքր ու միջին բիզնեսի զարգացումը:
Անդրադառնալով մարզի զարգացման քառամյա ծրագրինʽ համաձայն որի պետք է զարգանար Շիրակի մարզը, գիտաշխատող Ջոն Ասատրյանը «Առաջին լրատվական»,-ի հետ զրույցում նշեց.«Ծրագիր կազմելը շատ հեշտ է, մարդիկ պետք է իրագործեն իրենց ասածները, հակառակ պարագայում ինչքան ուզում է գեղեցիկ խոսեն, ոչ մի օգուտ չի լինի»: Նշենք, որ մարզի զարգացման քառամյա ծրագիրը կազմվել էր նախկին մարզպետ Լիդա Նանյանի ղեկավարման օրոք:
