ԱՄՆ-ը համարում է, որ 2011 թվականը բեկումնային էր ահաբեկչության դեմ գլոբալ պայքարում: Անցած տարի աշխարհում տեղի են ունեցել ավելի քիչ ահաբեկչական հարձակումներ, քան 2005 թվականին:
Այս մասին ասված է ահաբեկչության խնդրին վերաբերող ԱՄՆ պետդեպարտամենտի հրապարակած զեկույցում: Այդ ոլորտում որպես կարևորագույն իրադարձություն նշվում է 2011-ի մայիսին «Ալ-Քաիդա» ահաբեկչական խմբավորման առաջնորդ Ուսամա Բեն Լադենի մահը: «Ազատություն» ռադիոկայանի ռուսական ծառայության փոխանցմամբ` խմբավորման կրած ընդհանուր վնասները հանգեցրել են նրա ակնհայտ անկման:
Միևնույն ժամանակ, փորձագետները մատնանշում են ծայրահեղականների ակտիվացում այնպիսի անկայուն երկրներում, ինչպիսիք են` Լիբիան, Նիգերիան և Մալին: Պետդեպարտամենտը Իրանն անվանում է ահաբեկչության առաջատար հովանավորներից մեկը և անհանգստություն հայտնում Պակիստանում տեղակայված «Հակկանի ցանցի» առնչությամբ:
Զեկույցի հեղինակների տվյալներով` 2011 թվականին ամբողջ աշխարհում տեղի է ունեցել ավելի քան 10 հազար ահաբեկչական գործողություն, որին զոհ է գնացել 12,5 հազար մարդ:
