Ադրբեջանական Haqqin.az լրատվական կայքի փոխանցմամբ՝ Sky News հեռուստաընկերությունը սենսացիոն տեսանյութ է տարածել, որում երևում է, թե ինչպես են Ադրբեջանի սպորտի ու երիտասարդության նախարարության աշխատակիցները սև շուկայում վաճառում Օլիմպիական խաղերի տոմսերը, որոնք նախատեսված են պաշտոնատար անձանց համար:
Կադրում երևացող անձը պնդում է, թե աշխատում է Ադրբեջանի սպորտի ու երիտասարդության նախարարությունում և վաճառում է «անվճար» տոմսեր: Բռնցքամարտի մրցաշարին առնչվող այդ տոմսերից յուրաքանչյուրն ադրբեջանցին վաճառում է 20 ֆունտ ստեռլինգով: Նա չի խոսում անգլերեն, սակայն նրա ընկերը հայտնել է, որ նա արդեն իսկ վաճառել է մի քանի տոմս: Անցորդները նույնպես հայտնում են, որ այդ տոմսերը վաճառվում են այնտեղ, ուր գտնվում է Ադրբեջանի դրոշը:
