Այս տարվա առաջին կիսամյակում անչափահասների շրջանում նկատվել է հանցագործությունների թվաքանակի նվազում. 2012թ. վեց ամիսների ընթացքում գրանցվել է157 դեպք` նախորդ տարվա 255-ի դիմաց: Այսօր տեղի ունեցած մամուլի ասուլիսի ժամանակ այս մասին ասաց ոստիկանության քրեական հետախուզության գլխավոր վարչության անչափահասների գործերով բաժնի պետ Նելլի Դուրյանը:
«Այս տարվա առաջին վեց ամիսներին հանցագործություններ կատարել են 184 անչափահասներ՝ նախորդ տարվա 222-ի դիմաց: Ընդ որում, անչափահասների շրջանում ամենատարածվածը գույքի հափշտակման դեպքերն են՝ 90 դեպք, ինչը 75-ով քիչ է նախորդ տարվանից:
Առավել հաճախ հանդիպող հանցագործություններից երկրորդն է մարմնական վնասվածքներ հասցնելը`16 դեպք՝ նախորդ տարվա 25-ի դիմաց: Գրանցվել են նաև անչափահասների կողմից խուլիգանության, թմրանյութերի գործածման դեպքեր: Այս տարվա առաջին կիսամյակին ունեցել ենք թմրանյութի գործածման 1 դեպք` 2011-ին հայտնաբերված 4-ի դիմաց:
Ավելացել են անչափահասների կողմից ապօրինի սառը զենք պահելու դեպքերը՝ այս տարվա վեց ամիսներին գրանցվել է 8 դեպք` նախորդ տարվա 1-ի դիմաց: Բացի այդ, 2012-ի առաջին կիսամյակին արձանագրվել է անչափահասների նկատմամբ բռնությունների 108 դեպք՝ նախորդ տարվա 83-ի դիմաց: Սեռական բնույթի բռնությունները եղել են 43-ը: Ընդհանուր առմամբ, հանցագործություններ կատարողների գերակշիռ մասը տղաներ են, աղջիկները շատ քիչ տոկոս են կազմում»,- ասաց Նելլի Դուրյանը:
Ոստիկանության քրեական հետախուզության գլխավոր վարչության անչափահասների գործերով բաժնի պետի խոսքով` բավական արդյունավետ են դպրոցներում երեխաների շրջանում տարվող քարոզչական աշխատանքները:
«Ոստիկանապետի հրահանգն է ՝ ամեն օր լինել դպրոցներում: Պարզապես մեկ տեսուչին մեկ օրում կարող է 7-8 դպրոց բաժին ընկնել, մինչդեռ մարզերում ավելի շատ՝ մինչև 20 դպրոց: ԿԳՆ-ն կիսում է մեր՝ այս առումով ունեցած մտահոգությունը և մտածում ոստիկանության հետ նոր մոդելով աշխատելու մասին»,-ասաց նա՝ հավելելով, որ ներկայումս ոստիկանությունում հաշվառման է վերցված 382 երեխա:
Անդրադառնալով Youtube-ում ամիսներ առաջ հայտնված տեսանյութերին, որում աղջիկները դպրոցի բակում հայհոյում ու ծեծում էին միմյանց, Նելլի Դուրյանը նկատեց, որ երեխաների դաստիարակության հարցում առաջնային, կարևոր դերը պատկանում է ընտանիքին: «Ինչո՞ւ պետք է աղջիկները նման բառեր իմանան: Ընտանիքը շատ կարևոր դեր ունի աղջիկների դաստիարակության հարցում: Այդ է պատճառը, որ ոստիկանությունում աշխատանքներ են տարվում նաև հանցագործություն կատարած անչափահասների ծնողների հետ: Շատ դեպքերում հենց ծնողներն են ընտանիքից վանում իրենց երեխաներին, ստիպում հեռանալ տանից, ինչն էլ նրանց մղում է հանցագործություններ կատարելու»:
Ամփոփելով՝ Նելլի Դուրյանը նաև նկատեց՝ թյուր են այն կարծիքները, թե հանցագործություններ կատարող անչափահասների շրջանում մեծ թիվ են կազմում մանկատան սաները:
