1817թ. այս օրը Թեոդոսիայում ծնվեց հայազգի աշխարհահռչակ ծովանկարիչ, ռուսական կայսրության պատվավոր ծովակալ, Ռուսաստանի կայսերական ակադեմիայի անդամ Հովհաննես Այվազովսկին:
Իր ընտանիքի ազգանունն Այվազյան էր։ Նկարչի նկարներից մի քանիսը կրում են այս ստորագրությունը` Ованес Айвазян։ Նրա տաղանդն իր համար ճանապարհ բացեց դեպի Սիմֆերոպոլ քաղաքի գիմնազիա, հետագայում` Սանկտ Պետերբուրգի Գեղարվեստի ակադեմիա, որն ավարտեց ոսկե մեդալով։
Պարգևների արժանանալով իր վաղ շրջանի բնանկարների ու ծովանկարների համար` նկարիչն սկսում է նկարել Ղրիմի ծովափնյա քաղաքների պատկերների շարքը, այնուհետև մեկնում Եվրոպա: Կյանքի հետագա շրջանում նրա ծովանկարների և նավանկարների շարքերը նրան արժանացրին Ռուսաստանի նավատորմի մշտական ծառայողը լինելու պատվին։
Երկարատև ստեղծագործական կյանք ապրելով` նա դարձավ ժամանակի առավել հայտնի ռուսական նկարիչը։ Այվազովսկին թողել է 6000-ից ավելի կտավ: Իր հաջողակ ստեղծագործական գործունեության ընթացքում վաստակած գումարներով Այվազովսկին բացել է արվեստի դպրոց և պատկերասրահ իր հարազատ Թեոդոսիա քաղաքում։
Աշխատել է շատ արագ, տեսողական վիթխարի հիշողությամբ։ Պատկերել է ծովը՝ օրվա տարբեր ժամերին ու տարվա բոլոր եղանակներին։ խորապես զգացել և վերարտադրել է ծովային տարերքի անընդգրկելի վեհությունը, հրավառ արևածագն ու արևամուտը, կեսօրյա անդորրը, ալիքների ռիթմն ու նրանց վրա խայտացող լուսնի լույսը։ Բնությունն արտացոլել է մշտական շարժման և փոփոխության մեջ։
Վախճանվել է 1900 թ. մայիսի 5-ին: