Վանաձորի քաղաքապետի ընտրություններին ԲՀԿ-ն որոշել է որպես թեկնածու առաջադրել Լոռու ԲՀԿ-ական փոխմարզպետ Էդիկ Կարախանյանին: Այս մասին ԲՀԿ-ն արդեն պաշտոնապես հայտարարել է: Դատելով նրանից, որ վերջին ժամանակահատվածում ԲՀԿ թեկնածուները լուրջ մրցակիցներ են դարձել ՀՀԿ գործիչների համար և անգամ խորհրդարանական ընտրություններում որոշ համայնքներում հաղթանակ տարել, կարելի է ենթադրել, որ Վանաձորում թեժ պայքար է սպասվում:
Լոռու մարզպետ Արթուր Նալբանդյանին, սակայն, չեն վախեցնում ԲՀԿ-ական մրցակիցները: «Մենք բոլոր քաղաքական ուժերին նորմալ աչքով ենք նայում: Ես այստեղ պայքար չեմ տեսնում, ընտրություններ են, յուրաքանչյուրն իր թեկնածուն ունի: Բոլորի համար ստեղծված են հավասար պայմաններ, ժողովուրդն է որոշում կայացնում նման դեպքերում»,- «Առաջին լրատվական»-ին ասաց Արթուր Նալբանդյանը:
Մարզպետը նշեց, որ ինքը դեռ տեղյակ չէ իր տեղակալի առաջադրման մասին: Երբ մանրամասներ կիմանա, այն ժամանակ էլ իր գնահատականը կտա:
Խորհրդարանական ընտրություններում ԲՀԿ թեկնածուների հավաքած ձայները չեն վախեցնում ՀՀԿ-ական Լոռու մարզպետին:
«Մեր մարզում ես նման դեպք չեմ արձանագրել: Հիմա իմ վստահությունը շատ քիչ է, ժողովուրդն է կատարում իր ընտրությունը, ժողովուրդը կորոշի, թե ում է իր ձայնը տալիս»,- ասաց նա:
Արթուր Նալբանդյանը նաև խոստանում է, որ ՏԻՄ ընտրությունների ժամանակ Լոռիում իշխանական լծակները գործի չեն դրվի, արդար մրցակցություն կապահովվի:
«Մենք երբևիցե ստիպողաբար ընտրություն չենք արել մեր մարզում և նման մտադրություն չունենք: Նույնը խոստանում ենք ՏԻՄ ընտրություններին»,- ընդգծեց Լոռու մարզպետը:
Նշենք, որ Վանաձորի գործող ՀՀԿ-ական քաղաքապետ Սամվել Դարբինյանը նույնպես մտադիր է իր թեկնածությունն առաջադրել սեպտեմբերի 9-ին կայանալիք քաղաքապետի ընտրություններին:
