«Թավշյա հեղափոխությունն արդեն իսկ կյանքի կոչված է․ Սերժ Սարգսյանը որպես քաղաքական գործիչ, որպես վարչապետ շախմատային լեզվով ասած՝ տանուլ է տվել և տանուլ է տվել հենց այն պահից, երբ հայտարարեց, որ ինքն երբեք չի դառնա վարչապետ։ Ես ինքս հավատում էի, որ այս անգամ նա իր խոսքի տերը կլինի, բայց պարզվեց, որ այս անգամ էլ խոսքի տերը չի և սա ուղղակի խաբեություն էր՝ խաբեց մի ամբողջ ժողովրդի»,- «Առաջին լրատվական»-ի հետ զրույցում նշեց ԱԱԾ տնօրենի նախկին տեղակալ Գուրգեն Եղիազարյանը։
Վերջինիս խոսքերով, եթե Սերժ Սարգսյանն ականջալուր լիներ ժողովրդի հորդորներին և նոր Սահմանադրությամբ չվերարտադրվեր, ապա այսօր այս բողոքի ակցիաների ականատեսը չէինք լինի։
Անդրադառնալով նաև «Իմ քայլը» նախաձեռնության ամենօրյա խաղաղ անհնազանդության բողոքի ակցիաներին, հանրահավաքներին ու քայլերթերին, մեր զրուցակիցը ընդգծեց․
«Նիկոլ Փաշինյանին հաջողվեց դա անել, պետք է արձանագրենք, որ Նիկոլին հաջողվեց իր ներքին էներգիայի, իր ներքին մաքրության հաշվին ուսանողությանն ոտքի հանել և այն, ինչ այսօր տեղի է ունենում՝ Երևանում, ընդհանրապես Հայաստանում՝ պայծառագույն մղումն է մեր երիտասարդության և փառք Աստծուն, որ այսպիսի երիտասարդություն ունենք, որն այսօր դուրս է եկել չարիքի դեմ»։
Եղիազարյանը բացառեց այս անգամ ևս իշխանությունների կողմից 2008թ-ի Մարտի 1-ի սցենարի կրկնությունը՝ նշելով․
«Այս անգամ Սերժ Սարգսյանն էլ է զգում, որ վատ բան կլինի, իսկ էն անգամ չեղավ և չեղավ, որովհետև մտածում էինք, որ Երևանը կայրվի, ու բացի դրանից 2018թ-ը 2008թվական չէ ու այս անգամ մեր բանակն այդ քայլին չի գնա։ Բացի դրանից, ժողովրդի հետ բախման չպետք է գնա, որովհետև էս իշխանությունը 2-3 նման արյունոտ բախումներ մարսել են, բայց անգամ դա չի մարսվելու, իրոք չի մարսվելու»։
Մանրամասները՝ տեսանյութում։