«Առաջին լրատվական»-ի զրուցակիցն է քաղաքագետ, Ֆրանսիայի Ռազմավարական հետազոտությունների կենտրոնի փորձագետ Կայծ Մինասյանը:
-Պարոն Մինասյան, Արևմուտք-Ռուսաստան առճակատման հերթական փուլն է, այս անգամ պատժամիջոցներն ավելի քաղաքական տեսք ունեն, մի շարք երկրներ արտաքսում են ռուս դիվանագետներին: Ի՞նչ եք կարծում՝ Հայաստանն ինչպե՞ս պետք է դիրքավորվի, սա ինչպե՞ս կանդրադառնա մեզ վրա:
–Չեմ կարծում, որ դա որևէ կերպ կանդրադառնա Հայաստանի վրա: Հայաստանը պետք է առաջնորդվի իր շահերով և ուշադրություն դարձնի իր առաջնահերթություններին: Ըստ իս՝ Հայաստանը պետք է փորձի այդ ամենից հնարավորինս հեռու մնալ ու դիրքորոշում չհայտնել, որևէ կողմին չսատարել:
-Հայաստանը կարո՞ղ է Ռուսաստանից հեռու մնալ:
-Հայաստանը պետք է հեռու մնա այդ խնդրից: Չեմ կարծում, թե այսօր Հայաստանի առջև ընտրության հարց է դրված, ու Հայաստանը պարտավոր է միջամտել: Ըստ իս՝ ամենաճիշտ քաղաքականությունը կլինի այն, որ Հայաստանը ռուս-արևտմյան առճակատման մասնիկը չդառնա: Այդ խնդիրն ուղղակի ձևով Հայաստանին չի առնչվում: Գուցե անուղղակի ազդեցություն կա, բայց ուղղակի չկա, ուստի, իմ կարծիքով՝ Հայաստանն այս ամենից պետք է անմասն մնա: Այսօր Հայաստանը բավարար խնդիրներ ունի, պետք չէ դրանց գումարել ևս մեկը:
-Գիտեք, որ Հայաստանն ունի անվտանգության խնդիր, որը սերտորեն առնչվում է Ռուսաստանի հետ: Եթե դիտարկենք հարցն այս կոնտեքստում՝ ի՞նչ վտանգներ են հնարավոր:
-Չեմ կարծում, թե հատուկ ինչ-որ բան կա անելու: Պարզապես Հայաստանը պետք է այս բախման թիրախում չհայտնվի:
-ՀՀ պաշտպանության փոխնախարարը, օրինակ, հայտարարում է, որ ԱՄՆ–ի պատժամիջոցները Ռուսաստանի դեմ խնդիր են, սակայն մենք ունենք մեր անվտանգությունն ապահովելու հարց: Նաև ընդգծել է, որ Հայաստանը մեր շահերից ելնելով է առաջնորդվելու, և լավ կապեր ունենք Սերբիայի, Չինաստանի ու Լեհաստանի հետ: Ի՞նչ հնարավորություններ ունի Հայաստանը:
-Այն, ինչ գոյություն ունի այսօր Ռուսաստանի և Արևմուտքի միջև, այժմ միայն այդ տիրությում է, ի՞նչ կապ ունի Հայաստանը: Անշուշտ, Հայաստանը պետք է շատ դաշնակիցներ ունենա՝ Միջին Ասիա, Իրան, արաբական աշխարհ, Չինաստան, Հնդկաստան, Ճապոնիա: Աշխարհն Արևմուտքի ու Ռուսաստանի շուրջ չի պտտվում: Մենք չենք կարող միայն Ռուսաստանի ու Արևմուտքի հետ համագործակցել, այսօր Հայաստանը համագործակցում է, օրինակ, Իրանի հետ ու դա շատ լավ է, այդ երկրները ևս շահ ունեն մեզ հետ համագործակցել: Թվարկածս բոլոր պետությունները շահ ունեն, ու Հայաստանն էլ պետք է իրեն չմեկուսացնի ու լայն կապեր ստեղծի բոլորի հետ, չմնա այդ երկու գերտերությունների առճակատման արանքում:
-Հնարավո՞ր է՝ ռուս-ամերիկյան առճակատումը տեղափոխվի ղարաբաղյան ճակատ, որտեղ այդ գերտերությունները Մինսկի խմբի համանախագահող պետություններ են նաև:
–Բացարձակապես ոչ: Մինսկի խումբը գոյություն ունի գրեթե 25 տարի ու առաջին անգամ չէ, որ Արևմուտքի և Ռուսաստանի միջև խնդիրներ կան, ավելի բարդ ժամանակաշրջան է եղել, բայց որևէ անդրադարձ չի եղել ղարաբաղյան հարցի վրա: Այո՛, նրանք ունեն խնդիրներ, բայց Մինսկի խումբն այն ֆորմատն է, որտեղ նրանք համագործակցում են, և դա շատ լավ է: