«Ռոբերտ Քոչարյանն իմ նախագահն է ու միշտ իմ նախագահն է լինելու». այս հայտարարության հեղինակը ՀՀ քաղաքացիական ավիացիայի նախկին պետ Հովհաննես Երիցյանն է, ով պաշտոնավարել է ՀՀ երկրորդ նախագահ Ռոբերտ Քոչարյանի օրոք: Ավելին, Երիցյանը վստահեցնում է, որ Ռոբերտ Քոչարյանն անձամբ էր իրեն խնդրել Մոսկվայից վերադառնալ Հայաստան՝ ՀՀ քաղաքացիական ավիացիան ղեկավարելու համար:
Նախկին պաշտոնյան մշտապես հպարտանում է իր կապերով և Արտաշես Գեղամյանի հեղինակած գրքերում իր մասին հիշատակումներով: Մասնավորապես, նա հայտարարում է, որ զենքեր է նվեր ստացել ՌԴ նախագահ Վլադիմիր Պուտինից, ՀՀ և ԼՂՀ նախկին նախագահներից:
Թերևս հենց այդ կապերի շնորհիվ է, որ մինչ օրս Երիցյանն ազատության մեջ է, թեև մի քանի ընտանիքներ նրան մեղադրում են վաշխառությամբ և խարդախությամբ իրենց տնից զրկելու, նաև կյանքից զրկելու սպառնալիքներ հնչեցնելու մեջ:
Իդա Մելիքյանը, Գայանե Թումասյանը, Դավիդ Ստեփանյանը պնդում են, որ Հովհաննես Երիցյանը տարիներ շարունակ վաշխառությամբ է զբաղվել, խոշոր գումարներ է տոկոսով տվել և խաբեությամբ իրենց զրկել է անշարժ գույքերից: Երեքն էլ առանձին-առանձին դիմել են պատկան մարմիններին՝ հաղորդում են ներկայացրել հանցագործության մասին: Քննչական մարմիններն ու դատախազությունը, սակայն, ոչ մի կերպ չեն ցանկանում մեղադրանք առաջադրել Քոչարյանի մտերիմին:
Նախկին պաշտոնյայից տուժած քաղաքացիները դեռևս 2014 թվականին դիմել են կոռուպցիայի դեմ պայքարող «Վելես» հասարակական կազմակերպությանը, որն էլ դատական կարգով բողոքարկում է Երիցյանի օգտին կայացրած դատախազության որոշումները: Բողոքարկումը տարիներ է տևում, քանի որ դատախազությունն իր հերթին բողոքարկում է հօգուտ քաղաքացու կայացված դատական ակտը: Այս տարվա առաջին ամսվա ընթացքում «Վելես» ՀԿ-ն ևս երկու հաղթանակ ունեցավ դատարանում՝ ընդդեմ դատախազության ապօրինությունների:
Դավիդ Ստեփանյանի գործով որոշում է կայացվել գործն ուղարկել նախաքննություն: Գայանե Թումասյանի դեպքում էլ Վերաքննիչ քրեական դատարանն է նման որոշում կայացրել, և եթե ՀՀ դատախազությունը կամ անձամբ Հովհաննես Երիցյանը չբողոքարկի այդ որոշումը, ապա այդ գործով ևս կրկին նախաքննություն պետք է իրականացվի:
Նշենք,որ երկու գործով էլ դատարանները հաստատված են համարվել այն, որ նախաքննական մարմինը չի իրականացրել օբյեկտիվ և բազմակողմանի քննություն՝ խախտվելով Գայանե Թումասյանի և Դավիդ Ստեփանյանի իրավունքները: Երրորդ՝ Իդա Մելիքյանի գործով այս տարի նույնական բողոք է քննվում Կենտրոն և Նորք-Մարաշ վարչական շրջանների ընդհանուր իրավասության դատարանում: Հաշվի առնելով, որ Երիցյանին վերաբերող բոլոր գործերով քննիչներն օբյեկտիվ քննություն չեն իրականացնում, կարելի է ենթադրել, որ Իդա Մելիքյանի բողոքը ևս կբավարարվի դատարանի կողմից:
Հիշեցնենք, որ թե Իդա Մելիքյանի, թե Դավիդ Ստեփանյանի գործերում առկա են հեռախոսազրույցների ձայնագրություններ, որտեղ նախկին պաշտոնյան հայհոյում և սպառնում է քաղաքացիներին՝ խոստանալով, որ գումարը չվերադարձնելու դեպքում «արյուն ա լինելու»:
Ի դեպ, Հովհաննես Երիցյանը չի ընդունում, որ ինքը զբաղվում է վաշխառությամբ, պնդում է, որ ինքը հարգված անձնավորություն է, եկեղեցի է կառուցում և մարդկանց օգնում է գումարով: Իսկ իր դեմ հաղորդումներ ներկայացրած անձանց համարում է «ավանտյուրիստներ»:
