Ազգային անվտանգության ծառայության Սյունիքի մարզային վարչության Գորիսի բաժնի պետ Կարեն Ջավահիրյանի մոր՝ Արաքսյա Ղասումյանի և նրա քրոջ՝ Քնարիկ Ջավահիրյանի կողմից տասնյակ գորիսեցիների խաբելու միջոցով «Կամուրջ» վարկային կազմակերպությունից հազարավոր դոլարներ յուրացնելու փաստով, ինչպես հայտնի է, քրեական գործ էր հարուցվել, որը, քննիչի որոշմամբ, կարճվել էր։ Տուժած քաղաքացիներից Նաիրա Սահակյանը Քրեական հետապնդում չիրականացնելու քննիչի որոշման դեմ բողոք էր ներկայացրել Սյունքիի մարզի ընդհանուր իրավասության դատարան։
Երեկ այդ գործով նիստ էր նշանակված։ Կողմերը, ըստ ծանուցման, ներկայացել են դատարան, 1 ժամ սպասեուց հետո հանկարծ պարզ է դարձել, որ դատավոր Դավիթ Սարգսյանը նախապես նշանակված գործով առհասարակ դատարան չի ներկայացել։ Հայցվոր կողմին դատարանում տեղեկացրել են, որ դատավորը ծանրաբեռնվածության պատճառով չի կարող նիստ անցկացնել։ Դատական նիստն առանց կողմերի հետ համաձայնեցվելու հետաձգվել է և նշանակվել փետրվարի 14-ին։
Հիշեցնենք, որ մենք գրել էինք, որ անցած տարի Գորիսի մի շարք քաղաքացիներ շատ պատահաբար հայտնաբերել էին, որ իրենք հանդիսանում են «Կամուրջ» վարկային կազմակերպությունից վերցված վարկերի երաշխավորներ։ Իրենց անուններով վարկեր են ձևակերպված, որը չմարելու արդյունքում մարդկանց բնակարանները, գույքը հայտնվել է կալանքի տակ։ Մեր ձեռքի տակ հայտնված նյութերից, սակայն, պարզ է դառնում, որ Ղասումյանը և Քնարիկ Ջավահիրյանը շատ դեպքերում համոզել են քաղաքացիներին դառնալ իրենց վարկի երաշխավորը։ Նրանցից շատերն էլ ճանաչելով այդ անձանց և իմանալով, թե ովքեր են, վստահ են եղել, որ վարկերը կմարվեն, իրենք խնդիրներ չեն ունենա, և համաձայնել են։ Բայց երբ վարկը չի մարվել և իրենց գույքը հայտնվել է կալանքի տակ, նրանք դիմել են իրավապահներին։ Քրեական գործը, սակայն, երկարատև քննությունից հետո կարճվել էր և ԱԱԾ պաշտոնյայի ազգականները այդպես էլ մնացել էին անպատիժ։ Հիմա տուժած գորիսեցիներից ոմանք փորձում են դատական ճանապարհով արդարության հասնել։