Ազգային ժողովի «Ելք» խմբակցության պատգամավորներ Էդմոն Մարուքյանն ու Մանե Թանդիլյանն օրերս Հոլանդիայում մասնակցել են Եվրոպայի լիբերալ-դեմոկրատների ալյանսի տարեկան համագումարին։ «Առաջին լրատվական»-ի հետ զրույցում Մարուքյանը նշեց՝ աշխարհում լիբերալ արժեքների ռեգրես է տեղի ունենում, պոպուլիզմը գլուխ է բարձրացնում, և տարբեր երկրներում, օգտվելով լիբերալ արժեքների արդյունքում ձևավորված ինստիտուտներից, պոպուլիստները գալիս են իշխանության ու սկսում պայքարել ազատական արժեքների դեմ. «Շատ հետաքրքիր էր լսել տարբեր երկրների վարչապետերի ելույթները։ Մեծ հաշվով բոլորը տրամադրված էին նրան, որ 2019 թվականի Եվրախորհրդարանի ընտրություններին լավ պատրաստվեն և այնպես անեն, որ հաջորդ խորհրդարանում այն լինի երկրորդ ամենախոշոր ուժը»։
Մարուքյանը չի բացառում, որ «Լուսավոր Հայաստան»-ը ևս կանդամագրվի Լիբերալ-դեմոկրատների ալյանսին. «Գիտեք, որ «Լուսավոր Հայաստան»-ը հենց հիմնադրման պահից լիբերալ կուսակցություն է։ Այժմ հասել ենք այն փուլին, որ պետք է քննարկվի նաև անդամակցության հարցը»։
Մեր զրուցակցի խոսքով՝ այդ հեռանկարներին դեմ չեն նաև «Ելք» դաշինքի անդամ մյուս երկու կուսակցությունները. «Մենք այդ ճանապարհը բռնել ենք մինչև դաշինքի ստեղծումը։ Դա որևէ կերպ չի խանգարում դաշինքի գործունեությանը, ընդհակառակը՝ շատ տեղերում միայն օգուտ կարող է տալ»։
Հարցազրույցն ամբողջությամբ՝ տեսանյութում:
